തനിക്കും പിണറായിക്കും ജാമ്യമെടുത്ത് കാരാട്ട്

ന്യൂഡല്‍ഹി: കേന്ദ്ര കമ്മിറ്റി ചര്‍ച്ചകള്‍ക്കുശേഷം ലാവ്ലിന്‍ കരാര്‍, തിരഞ്ഞെടുപ്പു പരാജയം എന്നിവ സംബന്ധിച്ചു സിപിഎം ജനറല്‍ സെക്രട്ടറി പ്രകാശ് കാരാട്ട് നടത്തിയ പത്രസമ്മേളനത്തില്‍ ഊന്നിപ്പറഞ്ഞ രണ്ടു കാര്യങ്ങള്‍ ശ്രദ്ധേമായി. ഒന്ന്: ലാവ്ലിന്‍ കരാര്‍ സംസ്ഥാന സെക്രട്ടേറിയറ്റ് കൂട്ടായി കൈക്കൊണ്ട തീരുമാനമാണ്. പിണറായി വിജയന്‍ വ്യക്തിപരമായി എടുത്തതല്ല. രണ്ട്: തിരഞ്ഞെടുപ്പു പരാജയത്തിനു പാര്‍ട്ടി സെക്രട്ടറി എന്ന നിലയില്‍ തനിക്കുള്ള ഉത്തരവാദിത്തം മറ്റു കേന്ദ്ര കമ്മിറ്റി അംഗങ്ങള്‍ക്കുള്ളതു പോലെ തന്നെയാണ്. കാരണം, തിരഞ്ഞെടുപ്പിനുള്ള അടവുനയങ്ങളെല്ലാം കൂട്ടായി എടുത്തതാണ്. രണ്ടു കാര്യത്തിലും വ്യക്തികളുടെ മേല്‍ പഴിചാരുന്നതു ശരിയല്ലെന്ന സന്ദേശമാണു വരികള്‍ക്കിടയിലൂടെ വായിക്കാന്‍ കഴിയുന്നത്. ലാവ്ലിന്‍ സംബന്ധിച്ചു പ്രകാശ് കാരാട്ട് പറഞ്ഞതിന്റെ പൂര്‍ണരൂപം ഇങ്ങനെയാണ് - ഈ കരാറില്‍ അഴിമതി ഒന്നുമില്ല. ഇക്കാര്യം പാര്‍ട്ടി നേരത്തേ പറഞ്ഞതാണ്. ഇതു കോടതിയില്‍ തെളിയിക്കും. എസ്എന്‍സി ലാവ്ലിനുമായി കരാറില്‍ ഏര്‍പ്പെടാനുള്ള തീരുമാനം പിണറായി വിജയന്‍ വ്യക്തിപരമായി കൈക്കൊണ്ടതല്ല. പാര്‍ട്ടി സംസ്ഥാന സെക്രട്ടേറിയറ്റാണ് ഇതു തീരുമാനിച്ചത്. വിജയന്‍ അതു നടപ്പാക്കി എന്നേയുള്ളൂ. ലാവ്ലിന്‍ കേസ് സംബന്ധിച്ചു യുഡിഎഫും മാധ്യമങ്ങളും നടത്തിയ വന്‍ പ്രചാരണം തിരഞ്ഞെടുപ്പു ഫലത്തെ സ്വാധീനിച്ചിട്ടുണ്ട്.സംസ്ഥാന സെക്രട്ടേറിയറ്റ് ആണു ലാവ്ലിനുമായി കരാര്‍ ഒപ്പിടാന്‍ തീരുമാനിച്ചത് എന്നു പാര്‍ട്ടി ജനറല്‍ സെക്രട്ടറി പറയുമ്പോള്‍ അദ്ദേഹം പറയാതെ വിടുന്ന ഒരു കാര്യമുണ്ട് - സംസ്ഥാനത്തെ ഇടതുപക്ഷ മന്ത്രിസഭയല്ല ഈ തീരുമാനമെടുത്തത് എന്നതാണത്. ലാവ്ലിന്‍ കരാര്‍ ഒപ്പിട്ടശേഷമേ അതു സംസ്ഥാന മന്ത്രിസഭയുടെ മുന്‍പാകെ എത്തുന്നുള്ളൂ. മറ്റൊരു പ്രധാന സൂചന സംസ്ഥാന സെക്രട്ടേറിയറ്റ് കൂട്ടായി തീരുമാനിച്ചു എന്നു വരുമ്പോള്‍ ഇപ്പോള്‍ കേള്‍ക്കുന്ന ആരോപണങ്ങള്‍ ഒരു വ്യക്തിക്കെതിരെയല്ല സംസ്ഥാന സെക്രട്ടേറിയറ്റിന് എതിരെയാണ് എന്ന വ്യംഗ്യവുമുണ്ട്. കരാര്‍ ഒപ്പിട്ടതിന്റെ ഉത്തരവാദിത്തത്തില്‍ നിന്നു സംസ്ഥാന സെക്രട്ടേറിയറ്റിലെ ആര്‍ക്കും ഒഴിഞ്ഞുമാറാനാവില്ല എന്നുമുണ്ട് മറ്റൊരു സൂചന. സംസ്ഥാന സര്‍ക്കാര്‍ ഒപ്പുവച്ച ലാവ്ലിന്‍ കരാറിനു സംസ്ഥാന മുഖ്യമന്ത്രിയും മന്ത്രിമാരുമാണ് ഉത്തരവാദികള്‍ എന്നു പ്രകാശ് കാരാട്ട് പറയുന്നില്ല - അതായതു പാര്‍ട്ടി സെക്രട്ടേറിയറ്റിനാണ് അതിന്റെ മുഴുവന്‍ ഉത്തരവാദിത്തവും. മറ്റൊന്നു കൂടിയുണ്ട് - ഇതില്‍ എല്‍ഡിഎഫിലെ മറ്റൊരു ഘടകകക്ഷിക്കും പങ്കില്ല. സിപിഎം സെക്രട്ടേറിയറ്റിനാണു മുഴുവന്‍ പങ്കും. അഴിമതി ഇല്ല എന്നു പാര്‍ട്ടി ജനറല്‍ സെക്രട്ടറി പ്രഖ്യാപിച്ച നിലയ്ക്ക് ഇനി കോടതി അഴിമതിയോ ക്രമക്കേടോ കണ്ടെത്തിയാലുമുണ്ട് മറ്റൊരു വ്യാഖ്യാനം - അതിനു പാര്‍ട്ടി സെക്രട്ടേറിയറ്റ് കൂട്ടായി ഉത്തരവാദിത്തം ഏല്‍ക്കണം. ആണവവിഷയത്തില്‍ കേന്ദ്രമന്ത്രിസഭയ്ക്കുള്ള പിന്തുണ പിന്‍വലിച്ചതും തിരഞ്ഞെടുപ്പില്‍ മൂന്നാം മുന്നണിക്കു വേണ്ടി വാദിച്ചതും ഉള്‍പ്പെടെയുള്ള വിഷയങ്ങളില്‍ പാര്‍ട്ടി ജനറല്‍ സെക്രട്ടറിയെ പ്രതിക്കൂട്ടില്‍ നിര്‍ത്താന്‍ ശ്രമിച്ചവര്‍ക്കുള്ള മറുപടിയാണു പ്രകാശിന്റെ രണ്ടാമത്തെ പ്രസ്താവന - കൂട്ടായെടുത്ത തീരുമാനത്തിന്റെ ഒരു പങ്ക് ഉത്തരവാദിത്തമേ തനിക്കുള്ളൂ. കേരളത്തിലെ വിഷയങ്ങള്‍ ചര്‍ച്ചചെയ്യാന്‍ ജൂലൈ നാല്, അഞ്ച് തീയതികളില്‍ പ്രത്യേക പൊളിറ്റ് ബ്യൂറോ യോഗം വിളിക്കുന്നുവെന്നതില്‍ തന്നെ മറ്റൊരു തിരുത്തലുണ്ട് - ഇതുവരെ പൊളിറ്റ് ബ്യൂറോ പറഞ്ഞുകൊണ്ടിരുന്നതു കേരളത്തിലെ പാര്‍ട്ടിക്കുള്ളില്‍ പ്രത്യേകമായി ചര്‍ച്ചചെയ്യേണ്ട വിഷയമൊന്നും ഇല്ല എന്നായിരുന്നു. ലാവ്ലിന്‍ കരാര്‍ സംബന്ധിച്ചു പൊളിറ്റ് ബ്യൂറോയോ കേന്ദ്ര കമ്മിറ്റിയോ ഇതിനു മുന്‍പു വിശദമായ ഒരു ചര്‍ച്ചയും നടത്താത്തതാണു സ്ഥിതിഗതികള്‍ ഈ നിലയിലെത്തിച്ചത് എന്നു സ്വയം അംഗീകരിക്കുന്നു. അതിനാലാണു പ്രത്യേക പിബി വിളിക്കുന്നത്. കേരളത്തിലെ ഉള്‍പാര്‍ട്ടി പ്രശ്നങ്ങള്‍ ബംഗാളിലുള്ളതിനെക്കാള്‍ ഗുരുതരവും രൂക്ഷവും സ്ഫോടനാത്മകവുമായതു കൊണ്ടാണു കേരളത്തിനു വേണ്ടിമാത്രം ഈ ചര്‍ച്ച വേണ്ടിവരുന്നതും ബംഗാളിനു വേണ്ടിവരാത്തതും. വ്യക്തികളല്ല ഉത്തരവാദികള്‍, പാര്‍ട്ടിയുടെ സെക്രട്ടേറിയറ്റും കേന്ദ്ര കമ്മിറ്റിയുമാണ് എന്ന പ്രകാശ് കാരാട്ടിന്റെ പരാമര്‍ശത്തിനു മറ്റൊരു അര്‍ഥതലം കൂടിയുണ്ട് - വ്യക്തികളെക്കാള്‍ പ്രാധാന്യം പാര്‍ട്ടിക്കാണ്.