പുതിയ മണ്ഡലങ്ങള്‍ ആര്‍ക്കൊപ്പം?

എന്‍ പി ചന്ദ്രശേഖരന്‍

ഏപ്രില്‍ 16ന് കേരളം പോളിംഗ് ബൂത്തിലേക്കു നീങ്ങുകയാണ്. മെയ് 16ന് ഫലമറിയാം. അന്നാണ് ഇന്ത്യയിലാകെ വോട്ടെണ്ണുക. അന്നറിയാം 15-ാം ലോക്സഭയുടെ നിറം.

ഇന്ത്യയുടെയും കേരളത്തിന്റെയും തെരഞ്ഞെടുപ്പു ഭൂപടം ഇത്തവണ മാറിയിട്ടുണ്ട്. കാരണം, മണ്ഡലങ്ങള്‍ പുനര്‍ നിര്‍ണ്ണയിച്ചിരിക്കുന്നു. മാറിയ മണ്ഡലങ്ങളിലെ ബലാബലം ഇപ്പോഴും പൊതുജനത്തിന് അജ്ഞാതമാണ്. അതു കണ്ടെത്തലാണ് ഈ പരമ്പരയുടെ ലക്ഷ്യം.

1971ലെ ജനസംഖ്യ പ്രകാരം നിശ്ചയിച്ച മണ്ഡലങ്ങളാണ് ഇതുവരെ രാജ്യത്തുണ്ടായിരുന്നത്. 2001ലെ ജനസംഖ്യ പ്രകാരം അതു പുതുക്കി നിശ്ചയിച്ചിരിക്കയാണ് ഇപ്പോള്‍. വരുന്ന ലോക്സഭാ തെരഞ്ഞെടുപ്പ് പുതിയ ലോക്സഭാ മണ്ഡലങ്ങള്‍ വച്ചായിരിക്കും. അടുത്ത നിയമസഭാ തെരഞ്ഞെടുപ്പുകള്‍ക്ക് പുതിയ നിയമസഭാ മണ്ഡലങ്ങളും അടിസ്ഥാനമാക്കും.

പുനര്‍നിര്‍ണ്ണയിച്ചെങ്കിലും കേരളത്തിലെ ലോക്സഭാ മണ്ഡലങ്ങളുടെ എണ്ണം മാറിയില്ല - 20. നിയമസഭാ മണ്ഡലങ്ങളുടെ എണ്ണത്തിലും മാറ്റമില്ല - 140 തന്നെ.

പക്ഷേ മണ്ഡലങ്ങളില്‍ ചിലത് ഇല്ലാതായി. ചിലത് ഉണ്ടായി. മണ്ഡലങ്ങളുടെ അതിരുകളും മാറി.

പഴയ ലോക്സഭാ മണ്ഡലങ്ങള്‍ ഇവയാണ് - കാസര്‍കോട്, കണ്ണൂര്‍, വടകര, കോഴിക്കോട്, മഞ്ചേരി, പൊന്നാനി, പാലക്കാട്, ഒറ്റപ്പാലം, തൃശ്ശൂര്‍, മുകുന്ദപുരം, എറണാകുളം, മൂവാറ്റുപുഴ, ഇടുക്കി, കോട്ടയം, ആലപ്പുഴ, മാവേലിക്കര, കൊല്ലം, അടൂര്‍, ചിറയിന്‍കീഴ്, തിരുവനന്തപുരം. ഇതില്‍ ഒറ്റപ്പാലവും അടൂരും പട്ടികജാതി സംവരണ മണ്ഡലങ്ങളായിരുന്നു.

പുതിയ മണ്ഡലങ്ങള്‍ ഇവയാണ് - കാസര്‍കോട്, കണ്ണൂര്‍, വടകര, വയനാട്, കോഴിക്കോട്, മലപ്പുറം, പൊന്നാനി, പാലക്കാട്, ആലത്തൂര്‍, തൃശ്ശൂര്‍, ചാലക്കുടി, എറണാകുളം, ഇടുക്കി, കോട്ടയം, ആലപ്പുഴ, മാവേലിക്കര, പത്തനംതിട്ട, കൊല്ലം, ആറ്റിങ്ങല്‍, തിരുവനന്തപുരം. ഇവയില്‍ ആലത്തൂരും മാവേലിക്കരയുമാണ് പട്ടികജാതി സംവരണ മണ്ഡലങ്ങള്‍.

ലോക്സഭാ മണ്ഡലങ്ങള്‍ക്കു കീഴില്‍ വരുന്ന നിയമസഭാ മണ്ഡലങ്ങളുടെ പേരിലും അതിരിലുമൊക്കെ ഇതുപോലെ മാറ്റങ്ങളുണ്ട്.

ഈ മാറ്റം തെരഞ്ഞെടുപ്പു പ്രവചനങ്ങളെ അസാധ്യമാക്കുന്നു എന്ന് ഒരു വശത്ത് നിരീക്ഷകര്‍ പൊതുവെ പറയുന്നു. പുതിയ മണ്ഡലങ്ങളുടെ രാഷ്ട്രീയ സ്വഭാവം ഇങ്ങനെയാണ്, അങ്ങനെയാണ് എന്ന് മറുവശത്ത് മാധ്യമങ്ങള്‍ പറഞ്ഞുപോകുന്നു. പുതിയ മണ്ഡലങ്ങളുടെ വോട്ടിംഗ് സ്വഭാവം ശാസ്ത്രീയമായി നിര്‍ണ്ണയിക്കാനാവുമോ എന്ന ചോദ്യം പ്രസക്തമാകുന്നത് ഇവിടെയാണ്.

2004ലാണ് കഴിഞ്ഞ ലോക്സഭാ തെരഞ്ഞെടുപ്പ് നടന്നത്. ആ വോട്ടര്‍പ്പട്ടിക ഇപ്പോഴില്ല. പുതുക്കിയ വോട്ടര്‍പ്പട്ടിക തയ്യാറായിട്ടുണ്ട്. അതുവെച്ച് ഒരു തെരഞ്ഞെടുപ്പും നടന്നു - 2006ലെ നിയമസഭാ തെരഞ്ഞെടുപ്പ്. അന്നത്തെ പട്ടികയില്‍ കാലാനുസൃതമായ മാറ്റം വന്നിട്ടുണ്ട്. എങ്കിലും, ആ പട്ടികവച്ചാണ് വരുന്ന ലോക്സഭാ തെരഞ്ഞെടുപ്പു നടക്കാന്‍ പോകുന്നത്. അതുകൊണ്ട് 2006ലെ നിയമസഭാ തെരഞ്ഞെടുപ്പിലെ വോട്ടിംഗ് രീതി, വരുന്ന തെരഞ്ഞെടുപ്പിനും ബാധകമാണ്. ആ തെരഞ്ഞെടുപ്പില്‍ പുതിയ ലോക്സഭാ മണ്ഡലങ്ങളുടെ പരിധിയില്‍ രേഖപ്പെടുത്തിയ വോട്ടിന്റെ കണക്കെടുത്താല്‍ അവിടങ്ങളിലെ വോട്ടിംഗ് രീതി കണക്കാക്കാം. അതാണ് ഈ പരമ്പരയില്‍ ചെയ്യുന്നത്. 2006ലെ തെരഞ്ഞെടുപ്പില്‍ ഓരോ ബൂത്തിലും രേഖപ്പെടുത്തിയ വോട്ട് ശേഖരിച്ചാണ് വിവിധ ചേരികളുടെ വോട്ട് ഓഹരി നിര്‍ണ്ണയിച്ചത്.

ആദ്യം വടക്കന്‍ കേരളത്തിലെ മണ്ഡലങ്ങള്‍ നോക്കാം. നേരത്തേ ഈ മേഖലയില്‍ ആറു മണ്ഡലങ്ങളാണ് ഉണ്ടായിരുന്നത്. അത് ഏഴായി.

കാസര്‍കോട് മണ്ഡലം നിലനില്‍ക്കുന്നു. കാസര്‍കോട്ടെ നിയമസഭാ മണ്ഡലങ്ങള്‍ നേരത്തേ ഇവയായിരുന്നു - മഞ്ചേശ്വരം, കാസര്‍കോട്, ഉദുമ, ഹോസ്ദുര്‍ഗ്, തൃക്കരിപ്പൂര്‍, പയ്യന്നൂര്‍, തളിപ്പറമ്പ്. പുതിയ ഘടക മണ്ഡലങ്ങള്‍ ഇവയാണ് - മഞ്ചേശ്വരം, കാസര്‍കോട്, ഉദുമ, പയ്യന്നൂര്‍, കല്ല്യാശ്ശേരി, കാഞ്ഞങ്ങാട്, തൃക്കരിപ്പൂര്‍. കഴിഞ്ഞ ലോക്സഭാ തെരഞ്ഞെടുപ്പില്‍ മഞ്ചേശ്വരത്തും കാസര്‍കോട്ടും യുഡിഎഫും മറ്റ് അഞ്ചിടത്തും എല്‍ഡിഎഫുമാണ് മേല്‍ക്കൈ നേടിയത്. 1,08,256 വോട്ടിനാണ് എല്‍ഡിഎഫിന്റെ പി കരുണാകരന്‍ ജയിച്ചത്. 2006ലെ വോട്ടിംഗ് രീതിവെച്ചും കാസര്‍കോട്ടു മാത്രമാണ് യുഡിഎഫിന് മേല്‍ക്കൈയുള്ളത്. ബാക്കി ആറിടത്തും എല്‍ഡിഎഫിനാണ് മുന്‍തൂക്കം. മണ്ഡലമാകെ എടുത്താല്‍ എല്‍ഡിഎഫിനുള്ള മേല്‍ക്കൈ 90,000ത്തോളം വോട്ടാണ്. പക്ഷേ, എല്‍ഡിഎഫിന്റെ മേല്‍ക്കൈ നിലനില്‍ക്കുന്നു.

കണ്ണൂര്‍ മണ്ഡലവും നിലനില്‍ക്കുന്നു. പഴയ കണ്ണൂരിന്റെ ഘടകമണ്ഡലങ്ങള്‍ ഇരിക്കൂര്‍, അഴീക്കോട്, കണ്ണൂര്‍, എടക്കാട്, കൂത്തുപറമ്പ്, പേരാവൂര്‍, വയനാട് എന്നിവയായിരുന്നല്ലോ. പുതിയ കണ്ണൂരിലുള്ളത് തളിപ്പറമ്പ്, ഇരിക്കൂര്‍, അഴീക്കോട്, കണ്ണൂര്‍, ധര്‍മ്മടം, മട്ടന്നൂര്‍, പേരാവൂര്‍ മണ്ഡലങ്ങളാണ്. കഴിഞ്ഞ ലോക്സഭാ തെരഞ്ഞെടുപ്പില്‍ ഇരിക്കൂറിലും കണ്ണൂരിലും മാത്രമാണ് യുഡിഎഫിനു മുന്നില്‍ വരാനായത്. ബാക്കി അഞ്ചിടത്തും എല്‍ഡിഎഫ് മുന്‍തൂക്കം നേടിയിരുന്നു. എല്‍ഡിഎഫിന്റെ എ പി അബ്ദുള്ളക്കുട്ടി 83,849 വോട്ടിന്റെ വ്യത്യാസത്തിനാണ് യുഡിഎഫിന്റെ മുല്ലപ്പള്ളി രാമചന്ദ്രനെ തോല്‍പിച്ചത്. 2006ലെ വോട്ടിംഗ് പ്രകാരം പുതിയ നിയമസഭാ മണ്ഡലങ്ങളുടെ പരിധിയില്‍ ഇരിക്കൂറില്‍ മാത്രമാണ് യുഡിഎഫ് മുന്നിലുള്ളത്. മറ്റ് ആറിടത്തും എല്‍ഡിഎഫിനാണ് മുന്‍തൂക്കം. മണ്ഡലം ഒന്നിച്ചെടുത്താല്‍ എല്‍ഡിഎഫിന്റെ മേല്‍ക്കൈ 85,000 ഓളം വോട്ടിന്റേതാണ്. മണ്ഡലപുനര്‍ നിര്‍ണ്ണയം കണ്ണൂരില്‍ എല്‍ഡിഎഫിന് ആയിരത്തിലേറെ വോട്ടുകളുടെ ആനുകൂല്യം കൂടുതലായി നല്‍കി എന്നര്‍ത്ഥം.

വടകരയും നിലനില്‍ക്കുന്നു. പഴയ വടകരയുടെ ഘടകമണ്ഡലങ്ങള്‍ തലശ്ശേരി, പെരിങ്ങളം, വടകര, നാദാപുരം, മേപ്പയൂര്‍, കൊയിലാണ്ടി, പേരാമ്പ്ര എന്നിവയായിരുന്നു. പുതുക്കിയ വടകരയിലാകട്ടെ തലശ്ശേരി, കൂത്തുപറമ്പ്, വടകര, കുറ്റ്യാടി, നാദാപുരം, കൊയിലാണ്ടി, പേരാമ്പ്ര എന്നിവയാണ്. 2004ല്‍ ഏഴില്‍ ഏഴു ഘടകമണ്ഡലത്തിലും മുന്നിലെത്തിയാണ് എല്‍ഡിഎഫ് വടകരയില്‍ ജയിച്ചത്. 1,30,589 വോട്ടിന്റെ വ്യത്യാസത്തിനാണ് എല്‍ഡിഎഫിന്റെ അഡ്വ. പി സതീദേവി യുഡിഎഫിന്റെ അഡ്വ. എം ടി പത്മയെ തോല്‍പിച്ചത്. 2006ല്‍ പുതുക്കിയ വടകരയിലെ പുതിയ നിയമസഭാ മണ്ഡലങ്ങളിലെ വോട്ടിംഗ് അനുസരിച്ചും ഏഴില്‍ ഏഴിടത്തും എല്‍ഡിഎഫാണ് മുന്നില്‍. മണ്ഡലത്തിലെ എല്‍ഡിഎഫ് മേല്‍ക്കൈ 1,25,000 ഓളം വോട്ടാണ്. മണ്ഡല പുനര്‍നിര്‍ണയം എല്‍ഡിഎഫിന് വടകരയില്‍ 5000ഓളം വോട്ടിന്റെ കുറവുണ്ടാക്കിയെങ്കിലും മണ്ഡലം എല്‍ഡിഎഫിനൊപ്പം തന്നെ നില്‍ക്കുന്നുവെന്നു ചുരുക്കം.

വയനാട് പുതിയ മണ്ഡലമാണ്. ഏതെങ്കിലും മണ്ഡലം ഇല്ലാതായി പകരം വന്നതല്ല. തീര്‍ത്തും പുതിയ മണ്ഡലം. ഘടകമണ്ഡലങ്ങള്‍ മാനന്തവാടി, സുല്‍ത്താന്‍ ബത്തേരി, കല്‍പറ്റ, തിരുവമ്പാടി, ഏറനാട്, നിലമ്പൂര്‍, വണ്ടൂര്‍ എന്നിവയാണ്. 2006ലെ വോട്ടിംഗ് പ്രകാരം ഈ ഏഴുമണ്ഡലങ്ങളും എല്‍ഡിഎഫിന് ഒപ്പമാണ്. മണ്ഡലത്തില്‍ മൊത്തം എല്‍ഡിഎഫിനുള്ള മേല്‍ക്കൈ 39,000 ഓളം വോട്ടിന്റേതാണ്.

കോഴിക്കോട് നിലനില്‍ക്കുന്നു. പഴയ ഘടകമണ്ഡലങ്ങള്‍ ബാലുശ്ശേരി, കൊടുവള്ളി, കോഴിക്കോട് -1, കോഴിക്കോട് -2, തിരുവമ്പാടി, കല്‍പറ്റ, സുല്‍ത്താന്‍ ബത്തേരി എന്നിവയാണ്. പുതുക്കിയ കോഴിക്കോട്ടെ പുതിയ ഘടകമണ്ഡലങ്ങള്‍ ബാലുശ്ശേരി, എലത്തൂര്‍, വടക്കേ കോഴിക്കോട്, തെക്കേ കോഴിക്കോട്, ബേപ്പൂര്‍, കുന്ദമംഗലം, കൊടുവള്ളി എന്നിവയാണ്. 2004ല്‍ ഏഴില്‍ ഏഴു ഘടകമണ്ഡലങ്ങളിലും എല്‍ഡിഎഫിനായിരുന്നു മുന്‍തൂക്കം. 65,326 വോട്ടിന്റെ വ്യത്യാസത്തിനാണ് എല്‍ഡിഎഫിന്റെ എം പി വീരേന്ദ്രകുമാര്‍ യുഡിഎഫിന്റെ അഡ്വ. വി ബലറാമിനെ തോല്‍പിച്ചത്. 2006ലെ വോട്ടിംഗ് പ്രകാരം കോഴിക്കോട്ടെ പുതുക്കിയ ഘടകമണ്ഡലങ്ങളില്‍ ഏഴില്‍ ഏഴിലും എല്‍ഡിഎഫ് തന്നെ മുന്നിട്ടു നിന്നു. മണ്ഡലം ഒട്ടാകെയെടുത്താല്‍ എല്‍ഡിഎഫിന്റെ വോട്ട് ആനുകൂല്യം 1,00,000ഓളം ആണ്. പുനഃസംഘടനമൂലം കോഴിക്കോട്ട് എല്‍ഡിഎഫിന് 35,000ഓളം വോട്ടിന്റെ അധിക ആനുകൂല്യം കൈവന്നു എന്നു ചുരുക്കും.

മലപ്പുറം പുതിയ മണ്ഡലം. മഞ്ചേരിക്കുപകരം വന്നത്. ഘടകമണ്ഡലങ്ങള്‍ കൊണ്ടോട്ടി, മഞ്ചേരി, പെരിന്തല്‍മണ്ണ, മങ്കട, മലപ്പുറം, വേങ്ങര, വള്ളിക്കുന്ന്. പഴയ മഞ്ചേരിയുടെ ഘടകമണ്ഡലങ്ങള്‍ ബേപ്പൂര്‍, കുന്നമംഗലം, വണ്ടൂര്‍, നിലമ്പൂര്‍, മഞ്ചേരി, മലപ്പുറം, കൊണ്ടോട്ടി എന്നിവയായിരുന്നു. 2004ല്‍ ഏഴില്‍ അഞ്ചിടത്തും ഭൂരിപക്ഷം നേടിയാണ് മഞ്ചേരി എല്‍ഡിഎഫ് പിടിച്ചത്. 47,743 വോട്ടിന്റെ വ്യത്യാസത്തിനാണ് എല്‍ഡിഎഫിന്റെ ടി കെ ഹംസ യുഡിഎഫിന്റെ കെ പി എ മജീദിനെ തോല്‍പിച്ചത്. 2006ല്‍ പുതുക്കിയ മലപ്പുറം മണ്ഡലത്തിലെ ഏഴു ഘടകമണ്ഡലങ്ങളുടെ പരിധിയില്‍ ഏഴിടത്തും യുഡിഎഫിനാണ് മേല്‍ക്കൈ. പുതുക്കിയ മലപ്പുറം മണ്ഡലത്തിന്റെ പരിധിയില്‍ മൊത്തം 47,538 വോട്ടിന്റെ മേല്‍ക്കൈയും യുഡിഎഫിനുണ്ട്.

പൊന്നാനി നിലനില്‍ക്കുകയാണ്. പഴയ പൊന്നാനിയുടെ ഘടകമണ്ഡലങ്ങള്‍ തിരൂരങ്ങാടി, താന്നൂര്‍, തിരൂര്‍, പൊന്നാനി, കുറ്റിപ്പുറം, മങ്കട, പെരിന്തല്‍മണ്ണ എന്നിവയായിരുന്നു. പുതുക്കിയ പൊന്നാനിയുടെ ഘടകമണ്ഡലങ്ങള്‍ തിരൂരങ്ങാടി, താനൂര്‍, തിരൂര്‍, കോട്ടയ്ക്കല്‍, തവനൂര്‍, പൊന്നാനി, തൃത്താല എന്നിവയാണ്. 2004ലെ തെരഞ്ഞെടുപ്പില്‍ പൊന്നാനി നിയമസഭാ മണ്ഡലപരിധിയില്‍ മാത്രമാണ് എല്‍ഡിഎഫിനു മുന്നിലെത്താനായത്. ബാക്കി ആറിടത്തും യുഡിഎഫായിരുന്നു മുന്നില്‍. 1,02,758 വോട്ടിന്റെ വ്യത്യാസത്തിനാണ് യുഡിഎഫിന്റെ ഇ അഹമ്മദ് എല്‍ഡിഎഫിന്റെ പി പി സുനീറിനെ തോല്‍പിച്ചത്. 2006ലെ വോട്ടിംഗ് പ്രകാരം പൊന്നാനിയിലെ പുതുക്കിയ ഘടകമണ്ഡലങ്ങളുടെ പരിധിയില്‍ മൂന്നിടത്ത് എല്‍ഡിഎഫ് മുന്നിലുണ്ട് - തവനൂര്‍, പൊന്നാനി, തൃത്താല. യുഡിഎഫ് മുന്നിലുള്ള ഘടകമണ്ഡലങ്ങളുടെ എണ്ണം നാലായി കുറഞ്ഞു - തിരൂരങ്ങാടി, താനൂര്‍, തിരൂര്‍, കോട്ടയ്ക്കല്‍. യുഡിഎഫിന്റെ മൊത്തം ഭൂരിപക്ഷം 53,000ഓളം വോട്ടാണ്. പുനര്‍നിര്‍ണയത്തിലൂടെ പൊന്നാനിയിലെ യുഡിഎഫ് മേല്‍ക്കൈയില്‍ 51,000ഓളം വോട്ടിന്റെ കുറവു വന്നു എന്നു സാരം.

മലബാര്‍ മേഖലയില്‍ നേരത്തേ ആറു ലോക്സഭാ മണ്ഡലങ്ങളാണ് ഉണ്ടായിരുന്നത്. 2004ല്‍ അത് 5-1 എന്ന രീതിയില്‍ എല്‍ഡിഎഫും യുഡിഎഫും പങ്കിടുകയായിരുന്നു. പുനര്‍ നിര്‍ണയത്തിനുശേഷം മലബാര്‍ മേഖലയിലെ ലോക്സഭാ മണ്ഡലങ്ങളുടെ എണ്ണം ഏഴായി ഉയര്‍ന്നു. 2006ലെ വോട്ടിംഗ് പ്രകാരം അതിലെ എല്‍ഡിഎഫ് - യുഡിഎഫ് ബലാബലം 5-2 ആണ്.