തീവ്രവാദ സംഘടനകള്‍: പുകമറ ബാക്കി

തീവ്രവാദ സംഘടനകള്‍: പുകമറ ബാക്കി
ന്യൂദല്‍ഹി: അടുത്തിടെ രാജ്യത്തെ നടുക്കിയ സ്ഫോടന പരമ്പരകളുടെയെല്ലാം സൂത്രധാരകരായി അന്വേഷണ ഏജന്‍സികള്‍ വിരല്‍ചൂണ്ടുന്ന തീവ്രവാദ സംഘടനകള്‍ ഇപ്പോഴും ദുരൂഹതയുടെ പുകമറയില്‍തന്നെ. രണ്ട് തീവ്രവാദി സംഘടനകളിലേക്കാണ് അന്വേഷണ ഏജന്‍സികള്‍ വിരല്‍ചൂണ്ടുന്നത്. ഹര്‍കത്തുല്‍ ജിഹാദില്‍ ഇസ്ലാം എന്ന 'ഹുജി'യും ലശ്കറെ ത്വയ്യിബയും. ബംഗ്ലാദേശ്, പാക്കിസ്ഥാന്‍ എന്നിവിടങ്ങള്‍ കേന്ദ്രീകരിച്ച് പ്രവര്‍ത്തിക്കുന്നുവെന്ന് പറയപ്പെടുന്ന നിരോധിത സംഘടനകളാണിത്. അന്വേഷണ ഏജന്‍സികളുടെതന്നെ നിഗമനത്തില്‍ ഏറ്റവും കൂടുതല്‍ സ്ഫോടനങ്ങള്‍ നടത്തിയിരിക്കുന്നത് ഹുജിയാണ്.

തൊട്ടുപിറകില്‍ ലശ്കറെ ത്വയ്യിബ. ഒടുവില്‍ ബാംഗ്ലൂര്‍, അഹ്മദാബാദ് സ്ഫോടനങ്ങളുമായി ബന്ധപ്പെട്ട് 'ഇന്ത്യന്‍ മുജാഹിദീന്‍' എന്ന സംഘടനയും ചിത്രത്തിലെത്തി. എന്നാല്‍, ഇത് കടലാസ് സംഘടനയാണെന്നും അങ്ങനെയൊരു ഗ്രൂപ്പ് നിലവിലില്ലെന്നും ഇന്റലിജന്‍സ് വൃത്തങ്ങള്‍തന്നെ പറയുന്നു.

പഴയ സിമി തന്നെയാണ് ഇതെന്ന് പുതിയൊരു ഭാഷ്യവും അന്വേഷണത്തിന്റെ ചുവടുപിടിച്ച് ചില മാധ്യമങ്ങള്‍ പ്രചരിപ്പിക്കുന്നുണ്ട്. സിമി പ്രവര്‍ത്തകരെന്നാരോപിച്ച് നേരത്തേ അറസ്റ്റ് ചെയ്ത് വിട്ടയച്ചവരുടെയും ഇപ്പോള്‍ ജയിലിലുള്ളവരുടെയും പേരുകളും സ്ഫോടനങ്ങളുമായി ബന്ധപ്പെടുത്തുന്നത് ഈയൊരു നിഗമനത്തിലാണത്രെ. എന്നാല്‍ ഈ സംഘടനകളുടെ മേല്‍ കുറ്റാരോപണം നടത്തുന്നതല്ലാതെ ആ നിലയില്‍ അന്വേഷണം പുരോഗമിച്ചിട്ടില്ല.

ജയ്പൂര്‍ സ്ഫോടനത്തില്‍ 'ഹുജി'യുമായി ബന്ധപ്പെടുത്തി ചിലരെ അറസ്റ്റ് ചെയ്തെങ്കിലും കേസ് തെളിയിക്കാനാവാതെ വിട്ടയക്കുകയായിരുന്നു. ഇപ്പോള്‍ രണ്ടു സ്ഫോടനങ്ങളുടെയും ഉത്തരവാദിത്തം ഇന്ത്യന്‍ മുജാഹിദീനാണ് എന്നാണ് ആരോപിക്കപ്പെടുന്നത്. എന്നാല്‍, സംഭവങ്ങളില്‍ പങ്ക് തെളിയിക്കാവുന്നവിധം ഒരാളെയും പിടികൂടാന്‍ അന്വേഷണ ഉദ്യോഗസ്ഥര്‍ക്ക് കഴിഞ്ഞിട്ടില്ല.

ഇതിനകം അറസ്റ്റിലായ അഹ്മദാബാദിലെ മുഫ്തി ഹലീമിനെപ്പോലുള്ളവരെക്കുറിച്ച് ഉന്നയിക്കപ്പെട്ട ആരോപണങ്ങള്‍ അടിസ്ഥാനരഹിതമാണെന്ന വാദവുമായി കുടുംബാംഗങ്ങള്‍ രംഗത്തുവരികയും ചെയ്തു.

സോവിയറ്റ് യൂനിയന്റെ അഫ്ഗാന്‍ അധിനിവേശത്തെ ചെറുക്കാന്‍ 1984ല്‍ പാക്കിസ്ഥാന്‍ ആസ്ഥാനമായി രൂപവത്കരിക്കപ്പെട്ട സംഘടനയാണ് ഹുജി എന്ന് പറയപ്പെടുന്നു. 1997ല്‍ അമേരിക്കയാണ് ഭീകരസംഘടനയാണെന്ന് പ്രഖ്യാപിച്ച് ഹുജിയെ ആദ്യം നിരോധിക്കുന്നത്.

2005ല്‍ രാജ്യത്ത് നടന്ന മിക്ക ബോംബ് സ്ഫോടനങ്ങളിലും പങ്കുണ്ടെന്നാരോപിച്ച് ബംഗ്ലാദേശ് സര്‍ക്കാറും സംഘടനയെ നിരോധിച്ചു.

1991ല്‍ അഫ്ഗാനിസ്ഥാനിലെ കുനാര്‍ പ്രവിശ്യയില്‍ പിറവിയെടുത്തതെന്നു പറയുന്ന ലശ്കറെ ത്വയ്യിബയെയും അമേരിക്കയാണ് ആദ്യം ഭീകരസംഘടനയായി പ്രഖ്യാപിക്കുന്നത്^2001ല്‍. അടുത്ത വര്‍ഷം പാക് സര്‍ക്കാറും നിരോധിച്ചു.

ഇനാമുറഹ്മാന്‍

ഹലീമിന് സ്ഫോടന പരമ്പരയില്‍ പങ്കില്ലെന്ന് പോലിസ്
അഹ്മദാബാദ്: പോലിസ് കസ്റ്റഡിയില്‍ റിമാന്റിലുള്ള മുഫ്തി അബ്ദുല്‍ ഹലീമിന് അഹ്മദാബാദ് സ്ഫോടന പരമ്പരയില്‍ പങ്കുള്ളതായി ഇതുവരെ കണ്ടെത്താനായിട്ടില്ലെന്ന് പോലിസ്. ഗുജറാത്ത് കലാപത്തില്‍ അനാഥരായ കുട്ടികളെ തീവ്രവാദി പരിശീലനത്തിന് ഏര്‍പ്പാടുചെയ്തെന്ന അഞ്ചു വര്‍ഷം പഴക്കമുള്ള കേസിലാണ് ഹലീം അറസ്റ്റിലായതെങ്കിലും സ്ഫോടന പരമ്പരയിലെ പങ്കാളിത്തത്തെക്കുറിച്ചും ചോദ്യം ചെയ്തതായി ജോയന്റ് പോലിസ് കമീഷണര്‍ ആശിഷ് ഭാട്ടിയ പറഞ്ഞു. അതേസമയം അനധികൃത തടങ്കലിനെതിരെ ഹലീം നിരാഹാരം തുടങ്ങിയതായാണ് റിപ്പോര്‍ട്ട്. എന്നാല്‍, ഭാട്ടിയ ഇത് നിഷേധിച്ചു.

ഭര്‍ത്താവിന്റെ കൈപ്പടയിലുള്ള രേഖകള്‍ കണ്ടെത്താനെന്ന പേരില്‍ പോലിസ് കഴിഞ്ഞ ദിവസവും വീട്ടില്‍ പരിശോധന നടത്തിയതായി ഹലീമിന്റെ ഭാര്യ നൂര്‍ സബാ പറഞ്ഞു. കൈയെഴുത്തു രേഖകളെപ്പറ്റി ഒന്നുമറിയില്ലെന്ന് പറഞ്ഞപ്പോള്‍ പോലിസ് ഭീഷണിപ്പെടുത്തിയതായും അവര്‍ പരാതിപ്പെട്ടു.ഹലീമിന്റെ നിയമവിരുദ്ധ തടങ്കലിനെതിരെ ഇന്ന് ഹൈക്കോടതിയെ സമീപിക്കുമെന്ന് അഭിഭാഷകന്‍ ഹാശിം ഖുറൈശി അറിയിച്ചു.

കുട്ടികളെ തീവ്രവാദ പരിശീലനത്തിനയച്ചെന്ന പേരില്‍ അഞ്ചു വര്‍ഷം മുമ്പ് അറസ്റ്റ് ചെയ്ത ഹലീമിനെ ഹേബിയസ് കോര്‍പസ് ഹരജിയെ തുടര്‍ന്ന് വിട്ടയക്കുകയായിരുന്നു. എന്നാല്‍, കുറ്റപത്രം സമര്‍പ്പിച്ചപ്പോള്‍ ഇയാളെ പിടികിട്ടാപ്പുള്ളിയായാണ് കാണിച്ചത്. ദാനി ലിംദ പള്ളിയില്‍ എല്ലാ വെള്ളിയാഴ്ചയും ഖുതുബക്കെത്തുകയും നഗരത്തില്‍തന്നെ ആക്രി കച്ചവടം നടത്തി ജീവിക്കുകയും ചെയ്ത ഹലീമിനെ പിടികൂടാന്‍ ഒരു ശ്രമവും നടത്താതിരുന്ന പോലിസ് സ്ഫോടന പരമ്പരയില്‍ പങ്കുണ്ടെന്ന് സംശയിക്കുന്നതായി പറഞ്ഞ് പൊടുന്നനെ അറസ്റ്റ് ചെയ്യുകയായിരുന്നെന്ന് ഖുറൈശി കുറ്റപ്പെടുത്തി.
അഞ്ചു വര്‍ഷമായി പോലിസ് തങ്ങളെ നിരന്തരം പീഡിപ്പിച്ചുവരികയായിരുന്നെന്ന് നൂര്‍ സബാ മാധ്യമത്തോട് പറഞ്ഞു.
ഫാത്തിമ തന്‍വീര്‍