ദക്ഷിണ നാവിക സേനയുടെ ആസ്ഥാനത്ത് സര്‍വേ

കൊച്ചി: ദക്ഷിണ നാവിക സേനയുടെ ആസ്ഥാന കാര്യാലയത്തിന്റേതുള്‍പ്പെടെ വെല്ലിംഗ്ടണ്‍ ഐലന്റില്‍ ഭൂമി സര്‍വേ നടത്തിയ അന്യസംസ്ഥാനക്കാരായ രണ്ടുപേരെ പോലിസ്‌ കസ്റ്റഡിയിലെടുത്തു. ഡല്‍ഹി സ്വദേശി രാഹുല്‍ ഝാ (23), ബീഹാര്‍ സ്വദേശിയായ ഛന്ദന്‍(21) എന്നിവരെയാണ്‌ ഹാര്‍ബര്‍ പോലീസ്‌ പിടികൂടിയത്‌. ലിപ്ടണ്‍ സോഫ്റ്റ്‌വേര്‍ എക്സ്പോര്‍ട്ട്‌ ആന്‍ഡ്‌ പ്രൈവറ്റ്‌ ലിമിറ്റഡ്‌(രത്തണ്‍)എന്ന കമ്പനിയാണ്‌ ഇവരെ നിയോഗിച്ചതെന്ന്‌ അന്വേഷണത്തില്‍ വ്യക്തമായതായി പോലീസ്‌ പറഞ്ഞു. മൊബെയില്‍ കമ്പനികള്‍ക്ക്‌ വേണ്ടിയാണ്‌ കമ്പനി സര്‍വേ സംഘടിപ്പിച്ചതെന്നാണ്‌ ഇവര്‍ പോലിസിനോട്‌ പറഞ്ഞു.

മൊബെയില്‍ കമ്പനിയില്‍ നിന്നുള്ള മതിയായ രേഖകള്‍ ഹാജരാക്കാനില്ലാത്തതിനാല്‍ ഇവരെ സ്റ്റേഷനില്‍ കസ്റ്റഡിയില്‍ വച്ചിരിക്കുകയാണ്‌.ഇന്നലെ ഇച്ചയോടെ ഇവരില്‍ ഒരാളുടെ തിരിച്ചറിയല്‍ രേഖകള്‍ പോലീസിനു ലഭിച്ചു.അപരന്റെ വിശദ വിവരങ്ങള്‍ക്കായി പോലീസ്‌ ശ്രമിച്ചു വരുകയാണെന്ന്‌ അധികൃതര്‍ വ്യക്തമാക്കി. എന്നാല്‍ ചോദ്യങ്ങള്‍ക്കുള്ള ഇവരുടെ മറുപടി പരസ്പര വിരുദ്ധമാണെന്നതാണ്‌ കൂടുതല്‍ സംശയമുയര്‍ത്തിയിരിക്കുന്നത്‌. തീവ്രവാദപരമായ മറ്റൊരു സാമഗ്രികളും ഇവരില്‍ നിന്നും കണ്ടെടുത്തിട്ടില്ലെങ്കിലും കൂടുതല്‍ അന്വേഷണം നടത്തുന്നതായും ഇവര്‍ നിയോഗിക്കപ്പെട്ടുവെന്ന്‌ പറയുന്ന കമ്പനിയുമായി ബന്ധപ്പെട്ട്‌ വരികയാണെന്നും എറണാകുളം ഹാര്‍ബര്‍ പോലീസ്‌ സബ്‌ ഇന്‍സ്പെക്ടര്‍ പറഞ്ഞു.

ഹിന്ദി മാത്രമാണ്‌ പിടികൂടപ്പെടിരിക്കുന്നവര്‍ സംസാരിക്കുന്ന ഭാഷ. ഇത്‌ പോലീസിനു ബുദ്ധിമുട്ടാകുന്നുണ്ട്‌.ദ്വിഭാഷിയെ ഉപയോഗിച്ച്‌ കൂടുതല്‍ അന്വേഷണത്തിനു തയാറെടുക്കുകയാണ്‌ പോലീസ്‌.കേന്ദ്ര സര്‍ക്കാര്‍ പ്രതിരോധ കേന്ദ്രങ്ങളില്‍ ടെലകോം ടവറുകള്‍ക്കായി ആഴ്ചകള്‍ക്ക്‌ മുന്‍പ്‌ അനുമതി നല്‍കിയിരുന്നതായി റിപ്പോര്‍ട്ടുകളുണ്ട്‌. ഇതിന്റെ ചുവടുപിടിച്ചുള്ളതാണോ സര്‍വേ നടത്തിയതെന്നും അന്വേഷണത്തിലുണ്ട്‌. വെല്ലിംഗ്ടണ്‍ ഐലന്റില്‍ ദക്ഷിണ നാവിക സേനാ താവളമുള്‍പ്പെടെയുള്ള എന്‍ട്രി റിസ്ട്രിക്റ്റഡ്‌ സ്ഥലങ്ങള്‍ പോലീസ്‌ കസ്റ്റഡിയിലെടുത്തവരുടെ കൈയ്യിലുള്ള ഭൂപടത്തില്‍ പ്രത്യേകം രേഖപ്പെടുത്തിയിട്ടുണ്ട്‌.

ഇതാണ്‌ ഇവര്‍ തീവ്രവാദ പശ്ചാത്തലമുള്ളവരാണോ എന്ന്‌ സംശയമുയരാന്‍ കാരണം.ഇതേക്കുറിച്ചും പോലീസ്‌ അന്വേഷണം ആരംഭിച്ചിട്ടുണ്ട്‌.ഇന്നലെ ഫോണ്‍ സന്ദേശം വഴിയുണ്ടായ ബോംബുഭീഷണിയെ തുടര്‍ന്ന്‌ കൊച്ചി ദക്ഷിണമേഖല നാവികാസ്ഥാനത്ത്‌ സുരക്ഷാസംവിധാനങ്ങള്‍ ശക്തമാക്കിയിരുന്നു.ദക്ഷിണമേഖലാ നാവിക ആസ്ഥാനത്തെ പരേഡ്‌ ഗ്രൗണ്ടില്‍ ഓഗസ്റ്റ്‌ 15-ന്‌ മുമ്പായി ബോംബാക്രമണം നടത്തുമെന്ന ഭീഷണി സന്ദേശം ഇന്നലെ എത്തിയിരുന്നു.ഇതിനെ തുടര്‍ന്ന്‌ നിലവിലുണ്ടായിരുന്ന സുരക്ഷാ സംവിധാനങ്ങള്‍ കൂടുതല്‍ കര്‍ശനമാക്കി.

ഇതിന്റെ ഭാഗമായി നാവികാസ്ഥാനത്തിന്‌ മുമ്പിലുള്ള സെക്യൂരിറ്റി ചെക്കിംഗ്‌ കര്‍ശനമാക്കിയിട്ടുണ്ട്‌.കൂടുതല്‍ സുരക്ഷാ ഭടന്‍മാരെയും നിയോഗിച്ചു. നിലവിലുള്ള ബോംബ്‌ സ്ക്വോഡിന്‌ പുറമേ കൂടുതല്‍ സുരക്ഷാ ഉപകരണങ്ങള്‍ ഫോര്‍ട്ടുകൊച്ചി ഉള്‍പ്പെടെയുള്ള ദക്ഷിണ നാവിക സേനയുടെ എല്ലാ താവളങ്ങളിലും സജ്ജമാക്കിയിട്ടുണ്ട്‌. സിവിലിയന്‍മാര്‍ ഉള്‍പ്പെടെയുള്ളവര്‍ പ്രതിദിന ജോലിക്കായെത്തുന്നവരെ നാവിക ആസ്ഥാനത്ത്‌ കര്‍ശനമായ പരിശോധനയ്ക്ക്‌ ശേഷം മാത്രമേ ആരേയും അകത്തേക്ക്‌ കടത്തിവിടുകയൂള്ളൂവെന്നും സര്‍വേ ഉള്‍പ്പെടെയുള്ള കാര്യങ്ങളില്‍ നാവിക സേന അന്വേഷണം ആരംഭിച്ചിട്ടുണ്ടെന്നും കമാണ്ടര്‍ റോയ്‌ ഫ്രാന്‍സിസ്‌ പറഞ്ഞു.എന്തിനെയും നേരിടാന്‍ തങ്ങള്‍ തയാറെടുത്തുകഴിഞ്ഞുവെന്നും അദ്ദേഹം വ്യക്തമാക്കി.