Posted on: 09 May 2012
കോഴിക്കോട്/കണ്ണൂര്‍: റവലൂഷണറി മാര്‍ക്‌സിസ്റ്റ് പാര്‍ട്ടി നേതാവ് ടി.പി ചന്ദ്രശേഖരന്‍ വധക്കേസില്‍ നിര്‍ണായക വഴിത്തിരിവ്.വടകരക്കടുത്ത വള്ളിക്കാട്ടെത്തി കൃത്യം നടത്തിയതിയത് പള്ളൂര്‍ സ്വദേശി പായപ്പടി റഫീഖും കൊടിസുനിലുമാണെന്ന് ശാസ്ത്രീയ പരിശോധനയില്‍ തെളിഞ്ഞു.പ്രതികള്‍ സഞ്ചരിച്ച വാഹനത്തില്‍ നിന്ന് ലഭിച്ച വിരടയാളങ്ങള്‍ പരിശോധിച്ചപ്പോഴാണ് അത് ഇവര്‍ രണ്ടു പേരുടേതുമാണെന്ന് അന്വേഷണ സംഘം സ്ഥിതീകരിച്ചത്.
വാഹനത്തില്‍ നിന്ന് ലഭിച്ച വെള്ളി ബ്രെയ്‌സ്‌ലറ്റും റഫീഖിന്റേതാണെന്നും പരിശോധനയില്‍ തെളിഞ്ഞു.നാലു വിരളടയാളങ്ങള്‍ പ്രതികള്‍ സഞ്ചരിച്ച ഇന്നോവകാറില്‍ നിന്ന് കണ്ടെത്തിയിരുന്നു.
കൊടിസുനിലും റഫീഖും ന്യൂമാഹി ഇരട്ടക്കൊലക്കേസ് ഉള്‍പ്പെടെയുള്ള നിരവധി കേസുകളില്‍ പ്രതികളായതിനാല്‍ ഇവരുടെ വിരളടയാളങ്ങള്‍ നേരത്തെ തന്നെ പോലീസിന്റെ കൈവശമുണ്ടായിരുന്നു. അതുമായാണ് കാറില്‍ നിന്ന് ലഭിച്ച വിരലടയാളങ്ങള്‍ ഒത്തു നോക്കിയത്.ഇവര്‍ രണ്ട് പേരും ഉള്‍പ്പെട്ട ഏഴംഗ സംഘമാണ് സംഭവത്തിനു പിന്നിലെന്ന് നേരത്തെ പോലീസ് തിരിച്ചറിഞ്ഞിരുന്നു. ഇത് ശാസ്ത്രീയമായി തെളിയിക്കപ്പെട്ടതോടെ അന്വേഷത്തില്‍ കാര്യമായ പുരോഗതിയുണ്ടായിരിക്കുകയാണ്.
എന്നാല്‍ കേസില്‍ പ്രതികള്‍ മുങ്ങിയ സാഹചര്യത്തില്‍ അന്വേഷണസംഘം ലുക്കൗട്ട് നോട്ടീസ് ഇറക്കാന്‍ ശ്രമം തുടങ്ങി.മയ്യഴി കേന്ദ്രീകരിച്ച് പ്രവര്‍ത്തിക്കുന്ന ക്വട്ടേഷന്‍ സംഘങ്ങളാണ് കൊല നടത്തിയത്. ഇവരുടെ സഹായികളായ ചിലരെ കസ്റ്റഡിയിലെടുത്തിട്ടുണ്ടെങ്കിലും പ്രതികള്‍ എവിടെയാണെന്ന കൃത്യമായ വിവരം ലഭിച്ചിട്ടില്ല.
സംഘത്തില്‍ ആരെയെങ്കിലും പിടികൂടാന്‍ കഴിഞ്ഞാലേ ഗൂഢാലോചനയും രാഷ്ട്രീയബന്ധവും വ്യക്തമാവൂ. അതു കൊണ്ടാണ് ലുക്കൗട്ട് നോട്ടീസ് ഇറക്കുന്ന കാര്യം അന്വേഷണസംഘം പരിഗണിക്കുന്നത്. പ്രതികളുടെ ഫോട്ടോ അടക്കമുള്ള കാര്യങ്ങള്‍ പുറത്തുവിട്ടാല്‍ കണ്ടെത്താനുള്ള സാധ്യത കൂടുതലാണെന്നാണ് വിലയിരുത്തല്‍. രണ്ട് ദിവസത്തിനകം പുറത്തിറക്കുമെന്നാണ് അറിയുന്നത്.
ഇതേസമയം കൊലപാതകത്തിന്റെ അന്തിമ ഗൂഢാലോചന നടന്നെന്ന് കരുതുന്ന ചെക്യാട്ടെ വിവാഹവീട്ടിലെ വീഡിയോടേപ്പും അത് പകര്‍ത്തിയ സ്റ്റുഡിയോയിലെ കമ്പ്യൂട്ടറും അന്വേഷണസംഘം ചൊവ്വാഴ്ച പിടിച്ചെടുത്തു. ചെക്യാട് സ്വദേശി അന്തിയേരി സുരയുടെ മകളുടെ വിവാഹവീട്ടില്‍ ഗൂഢാലോചന നടന്നെന്നാണ് പോലീസ് പറയുന്നത്. വീഡിയോ ടേപ്പ് പരിശോധിച്ചുവരികയാണ്.
കൊടി സുനിയാണ് കൊലപാതകത്തിന്റെ മുഖ്യ സൂത്രധാരന്‍ എന്നാണ് കരുതുന്നത്. ഇയാള്‍ റഫീഖിനൊപ്പം കുടകിലേക്കോ ബാംഗ്ലൂരിലേക്കോ കടന്നിട്ടുണ്ടാവാമെന്നാണ് സൂചന. കൊടി സുനിയെ കണ്ടെത്താനുള്ള അന്വേഷണത്തിന്റെ ചുമതല എ.ഐ.ജി. അനൂപ്കുരുവിള ജോണിന് നല്‍കിയിട്ടുണ്ട്. കൃത്യം നടത്തി രക്ഷപ്പെടാന്‍ സൗകര്യമുള്ളയാളാണ് സുനി. മാഹിയിലെ ഇരട്ടക്കൊലക്കേസിലെ പ്രതിയായ ഇയാളെ നേരത്തേ പിടികൂടിയത് അനുപ് കുരുവിളയുടെ നേതൃത്വത്തിലുള്ള സംഘമായിരുന്നു. ഇയാളുടെ നീക്കങ്ങളും പ്രവര്‍ത്തന രീതികളും മനസ്സിലാക്കിയാണ് അന്ന് പ്രതിയെ കുടുക്കാന്‍ പോലീസിന് കഴിഞ്ഞത്. അന്നത്തെ അന്വേഷണസംഘത്തിലുണ്ടായിരുന്ന പോലീസുദ്യോഗസ്ഥരുടെ സഹായത്തോടെയാണ് സുനിക്കുവേണ്ടി തിരച്ചില്‍ നടക്കു
ന്നത്.
കൊടി സുനിയുടെ സംഘത്തില്‍പ്പെട്ട പാറാല്‍ സ്വദേശി ഷാമില്‍ ഉള്‍പ്പെടെ മൂന്നുപേര്‍ പോലീസ് കസ്റ്റഡിയിലുണ്ട്. പ്രതികളുടെ ഒളിത്താവളങ്ങള്‍ മനസ്സിലാക്കാനായി ഇവരുമായി അടുത്ത ബന്ധമുള്ള 20 പേരെ പോലീസ് ചോദ്യംചെയ്തിട്ടുണ്ട്. പക്ഷേ അവരില്‍ നിന്ന് കാര്യമായ സൂചനകളൊന്നും ലഭിച്ചിട്ടില്ല.
ചൊക്ലിയില്‍ വാഹനമുപേക്ഷിച്ച് സുരക്ഷിതമായി കടക്കാന്‍ കഴിയുന്നത് കര്‍ണാടകയിലേക്കാണ്. സംശയമുള്ള മൊബൈല്‍നമ്പറിലേക്ക് വിളിച്ചപ്പോള്‍ കന്നഡ ഭാഷ കേട്ടതും ഈ സാധ്യതക്ക് ആക്കം കുട്ടുന്നു. എന്നാല്‍ ഇവര്‍ കര്‍ണാടകയില്‍ തന്നെയാകണമില്ലെന്ന് പോലീസ് കരുതുന്നു. കണ്ണൂരിലെ ഏതെങ്കിലും പാര്‍ട്ടിഗ്രാമങ്ങളില്‍ പ്രതികള്‍ സുരക്ഷിതരായിരിക്കാമെന്നാണ് പോലീസ് തുടക്കം മുതലേ കരുതുന്നത്. അതുകൊണ്ടാണ് സി.പി.എമ്മിന്റെ കേന്ദ്രങ്ങളില്‍ റെയ്ഡ് നടത്തുന്നത്. തലശ്ശേരിയിലെ സി.പി.എം സ്വാധീനമേഖലകളായ ഉക്കന്‍പീടിക, ഇല്ലത്തുതാഴ എന്നിവിടങ്ങളില്‍ ചൊവ്വാഴ്ചയും പരിശോധന നടന്നു.
പരോളില്‍ ഇറങ്ങിയ പ്രതികള്‍ കേസില്‍ ഉള്‍പ്പെട്ടിട്ടുണ്ടെന്ന സൂചനയുടെ അടിസ്ഥാനത്തില്‍ അടുത്ത കാലത്ത് കണ്ണൂര്‍ സെന്‍ട്രല്‍ജയിലില്‍നിന്ന് പരോളില്‍ ഇറങ്ങിയ 13 പേരുടെ പട്ടിക ശേഖരിച്ചിട്ടുണ്ട്. ഇതില്‍ അന്തിയേരി സുര ഉള്‍പ്പെടെ നാല് സി.പി.എമ്മുകാരുണ്ട്. കേസുമായി ബന്ധപ്പെട്ടയാളെന്നു കരുതുന്ന ജയിലില്‍ കഴിയുന്ന പ്രധാന കക്ഷിയും അന്തിയേരി സുരയാണ്.
No comments:
Post a Comment