| Mangalam may 10. 2012 |
Text Size:    |
| കണ്ണൂര്‍: രാഷ്‌ട്രീയ കൊലക്കേസില്‍ പ്രതികളായി ജയിലിലെത്തുന്നവരും അടിപിടി, പിടിച്ചുപറി കേസുകളിലെ പ്രതികളും തമ്മില്‍ ജയിലില്‍ ഉണ്ടാക്കിയെടുക്കുന്ന സൗഹൃദങ്ങള്‍ വളരുന്നതു ക്വട്ടേഷന്‍ സംഘങ്ങളിലേക്ക്‌. രാഷ്‌ട്രീയ കൊലക്കേസില്‍ പ്രതികളാകുന്നവരുടെ കുടുംബകാര്യങ്ങള്‍ പാര്‍ട്ടികള്‍ തന്നെ നോക്കുകയാണു പതിവ്‌. മാസാമാസം നിശ്‌ചിത തുക ഇവരുടെ വീട്ടില്‍ പാര്‍ട്ടി പ്രതിനിധികള്‍ തന്നെ എത്തിക്കും. ഇക്കാര്യം അറിയാവുന്നതിനാല്‍ കുടുംബത്തെക്കുറിച്ചു വേവലാതി ഇല്ലാത്ത പ്രതികള്‍ ജയിലില്‍ മറ്റു തടവുപുള്ളികളുമായി വന്‍സൗഹൃദമുണ്ടാക്കും. ഇവര്‍ പലപ്പോഴും മദ്യം- മയക്കുമരുന്ന്‌ എന്നിവയ്‌ക്ക് അടിമപ്പെടുകയും ചെയ്യുന്നതായി അധികൃതര്‍ക്കുതന്നെ ബോധ്യമുള്ളതുമാണ്‌. പുറത്തിറങ്ങിയാല്‍ കുത്തഴിഞ്ഞ ജീവിതം നയിക്കാന്‍ പണം ആവശ്യമായി വരുന്നതോടെയാണ്‌ ഇവര്‍ ക്വട്ടേഷന്‍ ഇടപാടുകള്‍ തുടങ്ങുന്നത്‌. അപ്പോഴും പാര്‍ട്ടിയുമായി ബന്ധം സൂക്ഷിക്കാന്‍ ഇവര്‍ ശ്രദ്ധിക്കാറുണ്ടെന്നാണു പല ക്രിമിനല്‍ക്കേസുകളിലും പ്രതിയായവരുടെ ചരിത്രം വ്യക്‌തമാക്കുന്നത്‌. അതുകൊണ്ടാണ്‌ ഇവരുടെ വീട്ടില്‍ നടക്കുന്ന ആഘോഷങ്ങളില്‍ തങ്ങളുടെ രാഷ്ര്‌ടീയ പ്രസ്‌ഥാനത്തിലെ ഉന്നത നേതാക്കള്‍ വരെ പങ്കെടുക്കുന്നതും. റവലൂഷനറി മാര്‍ക്‌സിസ്‌റ്റ് പാര്‍ട്ടി നേതാവ്‌ ചന്ദ്രശേഖരന്‍ വധക്കേസില്‍ പോലീസ് അന്വേഷിക്കുന്ന പായപ്പടി റഫീഖ്‌ പ്രതിയായ കേസുകള്‍ പലതും സി.പി.എമ്മുമായി ബന്ധപ്പെട്ട രാഷ്‌ട്രീയ കേസുകളും ക്വട്ടേഷന്‍ ഏര്‍പ്പാടും തന്നെയാണെന്നും പോലീസ് കണ്ടെത്തി. തലശേരിക്കു തൊട്ടടുത്തുളള മാഹി, മദ്യമാഫിയ ഉള്‍പ്പടെയുളളവരുടെ കേന്ദ്രമാണ്‌. ക്വട്ടേഷന്‍ ആവശ്യത്തിനായി മദ്യമാഫിയ ഉപയോഗിക്കുന്നതും രാഷ്‌ട്രീയ കൊലക്കേസ്‌ പ്രതികളെയാണ്‌. ഈ മേഖലയില്‍ ക്വട്ടേഷന്‍ സംഘങ്ങള്‍ പെരുകാനുളള കാരണവും ഇതാണ്‌. ഡസന്‍ കണക്കിനു ക്വട്ടേഷന്‍ സംഘങ്ങളാണ്‌ മാഹി കേന്ദ്രീകരിച്ചു പ്രവര്‍ത്തിക്കുന്നതെന്നും അന്വേഷണ സംഘത്തിനു വ്യക്‌തമായിട്ടുണ്ട്‌. ചന്ദ്രശേഖരന്‍ വധത്തിനു പിന്നിലുള്ള കൊടി സുനി, പായപ്പടി റഫീഖ്‌, മനോജ്‌, അശോകന്‍ എന്നിവര്‍ കണ്ണൂര്‍ സെന്‍ട്രല്‍ ജയിലില്‍ കഴിയുന്ന തടവുപുള്ളി അന്ത്യേരി സുരേന്ദ്രനുമായി ഉറ്റബന്ധം പുലര്‍ത്തിയിരുന്നതായും പ്രത്യേക പോലീസ് സംഘത്തിനു വിവരം ലഭിച്ചിട്ടുണ്ട്‌. |
Wednesday, May 9, 2012
പല കേസുകളിലായി ജയിലിലെത്തും; ഒരേ സംഘമായി പുറത്തിറങ്ങും
No comments:
Post a Comment