ഒഞ്ചിയം ഓപ്പറേഷന്‍: പിന്നില്‍ വ്യവസായിയും 3 രാഷ്‌ട്രീയ നേതാക്കളും

mangalam may 10, 2012
Text Size:
തിരുവനന്തപുരം: ഒരു വ്യവസായിയുടെയും മൂന്നു രാഷ്‌ട്രീയ നേതാക്കളുടെയും പിന്‍ബലത്തില്‍ കൊടി സുനിയുടെ നേതൃത്വത്തിലുള്ള പന്ത്രണ്ടംഗ സംഘമാണ്‌ ഒഞ്ചിയത്തെ റവലൂഷണറി മാര്‍ക്‌സിസ്‌റ്റ് പാര്‍ട്ടി നേതാവ്‌ ടി.പി. ചന്ദ്രശേഖരനെ കൊലപ്പെടുത്താനുള്ള ഓപ്പറേഷനു നേതൃത്വം നല്‍കിയതെന്ന്‌ അന്വേഷണ സംഘത്തിനു സൂചന ലഭിച്ചു.

കൊലയ്‌ക്കുശേഷം കാര്‍ കഴുകി വൃത്തിയാക്കിയ ഓക്രി മനോജില്‍നിന്നാണു സുപ്രധാനമായ ഈ വിവരം ലഭിച്ചത്‌. പ്രതികളെന്നു സംശയിക്കപ്പെടുന്നവരെ പിടികൂടിയശേഷം ഇവരെ ചോദ്യംചെയ്യും. ഓക്രി മനോജ്‌, എസ്‌.അശോകന്‍, സുമോഹന്‍ എന്നിവരെ അന്വേഷണസംഘം കസ്‌റ്റഡിയിലെടുത്തതായി 'മംഗളം' നേരത്തെ റിപ്പോര്‍ട്ട്‌ ചെയ്‌തിരുന്നു.

മാരകമായ രീതിയില്‍ ചന്ദ്രശേഖരനെ മുറിവേല്‍പ്പിച്ച വെട്ടുകളെല്ലാം ഇടംകൈയനും ഗുണ്ടയുമായ വടകര ഷഹീലിന്റേതാണെന്ന നിഗമനത്തിലാണു പോലീസ്‌. കേസുമായി ബന്ധപ്പെട്ടു മുപ്പതോളം പേരെ പ്രത്യേകസംഘം കസ്‌റ്റഡിയിലെടുത്തിട്ടുണ്ട്‌. ശാസ്‌ത്രീയമായ രീതിയില്‍ കേസ്‌ തെളിയിക്കാനാണ്‌ എ.ഡി.ജി.പി. വിന്‍സന്‍ എം. പോളിന്റെ നേതൃത്വത്തിലുള്ള പ്രത്യേകസംഘത്തിന്റെ ശ്രമം.

ഇരുന്നൂറോളം മൊബൈല്‍ നമ്പരുകള്‍ സൈബര്‍ സെല്ലിന്റെ സഹായത്തോടെ പരിശോധിച്ചുവരികയാണ്‌. പ്രാദേശിക രാഷ്‌ട്രീയ നേതാക്കളുടെ മൊബൈല്‍ നമ്പരുകളും ഇതില്‍പ്പെടും. കൊലയാളിസംഘത്തിലെ ഇടംകൈയന്‍ ഒളിവിലാണ്‌.

കൊടി സുനിയടക്കമുള്ള അഞ്ചുപേരെ കണ്ടുപിടിക്കുന്നതിനായി ലുക്ക്‌ ഔട്ട്‌ നോട്ടീസ്‌ നാളെ പുറപ്പെടുവിച്ചേക്കും. കേന്ദ്ര ഏജന്‍സികള്‍ക്കും കൊലയാളിസംഘത്തെക്കുറിച്ചുള്ള വിവരങ്ങള്‍ കൈമാറി.

ഡിവൈ.എസ്‌.പിയുടെ നേതൃത്വത്തില്‍ ഹൈദരാബാദിലേക്കുപോയ പ്രത്യേകസംഘം കഴിഞ്ഞദിവസം വെറുംകൈയോടെ തിരിച്ചെത്തി.

ഒളിവില്‍ പോയ പ്രതികളെന്നു സംശയിക്കപ്പെടുന്നവര്‍ക്ക്‌ സാമ്പത്തിക സഹായം നല്‍കിയതിന്റെ പേരിലാണ്‌ വ്യവസായ പ്രമുഖനിലേക്ക്‌ അന്വേഷണം നീണ്ടത്‌. ഇക്കാര്യം സ്‌ഥിരീകരിക്കാന്‍ അന്വേഷണസംഘം തയാറായിട്ടില്ല.

പ്രതികളെ നെയ്യാറ്റിന്‍കര തെരഞ്ഞെടുപ്പിനു മുന്‍പ്‌ അറസ്‌റ്റ് ചെയ്യാന്‍ ആഭ്യന്തരമന്ത്രി തിരുവഞ്ചൂര്‍ രാധാകൃഷ്‌ണന്‍ നിര്‍ദേശം നല്‍കി. അന്വേഷണം നീണ്ടുപോകുന്നത്‌ പലവിധ സംശയങ്ങള്‍ക്കും ഇടംനല്‍കുമെന്ന്‌ തലസ്‌ഥാനത്ത്‌ കഴിഞ്ഞ ദിവസം ചേര്‍ന്ന പോലീസിന്റെ ഉന്നതതല യോഗത്തില്‍ മന്ത്രി സൂചിപ്പിച്ചിരുന്നു.

കൊലപാതകം നടത്താനുളള ആസൂത്രണം കണ്ണൂരില്‍വച്ചുതന്നെയായിരുന്നു.

സാഹചര്യ തെളിവുകള്‍ രാഷ്‌ട്രീയ ഗൂഢാലോചനയിലേക്ക്‌ എത്തിച്ചേര്‍ന്നിട്ടില്ലെങ്കിലും ഉന്നത രാഷ്‌ട്രീയക്കാര്‍ അറിയാതെ കൊലപാതകം നടക്കാനിടയില്ലെന്ന പ്രാഥമിക നിഗമനത്തിലാണ്‌ പോലീസ്‌.

എസ്‌. നാരായണന്‍