എച്ച്‌.എം.ടി. ഭൂമിവിവാദം യൂത്ത്‌ കോണ്‍ഗ്രസ്‌ മാര്‍ച്ച്‌ അക്രമാസക്തമായി; ജലപീരങ്കിയും കണ്ണീര്‍വാതകവും പ്രയോഗിച്ചു

30 Jan 2008
കൊച്ചി: യൂത്ത്‌ കോണ്‍ഗ്രസ്‌ പ്രവര്‍ത്തകര്‍ നഗരത്തില്‍ നടത്തിയ മാര്‍ച്ച്‌ അക്രമാസക്തമായി. പ്രകടനക്കാര്‍ക്കുനേരെ പോലീസ്‌ ജലപീരങ്കിയും കണ്ണീര്‍വാതക ഷെല്ലും പ്രയോഗിച്ചു.

ഷെല്‍ പൊട്ടിത്തെറിച്ച്‌ പരിക്കേറ്റ മൂന്ന്‌ യൂത്ത്‌ കോണ്‍ഗ്രസ്‌ പ്രവര്‍ത്തകരെ ഇന്ദിരാഗാന്ധി സഹകരണ ആസ്‌പത്രിയില്‍ പ്രവേശിപ്പിച്ചു. ആറുപേര്‍ക്ക്‌ പ്രാഥമികചികിത്സ നല്‍കി വിട്ടയച്ചു. പോലീസ്‌ പ്രയോഗിച്ച ഷെല്ലുകളില്‍ ചിലത്‌ മഹാരാജാസ്‌ കോളേജ്‌ ഓഡിറ്റോറിയത്തിനടുത്ത്‌ വീണ്‌ പൊട്ടിയതുമൂലം ഇവിടെ പരീക്ഷയെഴുതാനിരുന്ന കുട്ടികള്‍ക്ക്‌ കണ്ണെരിച്ചിലും അസ്വസ്ഥതകളും അനുഭവപ്പെട്ടു.

എച്ച്‌.എം.ടി. ഭൂമിയിടപാടില്‍ ഇടനിലക്കാരായ മന്ത്രിമാര്‍ രാജിവയ്‌ക്കണമെന്നാവശ്യപ്പെട്ടാണ്‌ യൂത്ത്‌ കോണ്‍ഗ്രസ്‌ മാര്‍ച്ച്‌ നടത്തിയത്‌. ചൊവ്വാഴ്‌ച രാവിലെ 11ന്‌ ഡി.സി.സി. ഓഫീസില്‍നിന്നാരംഭിച്ച മാര്‍ച്ച്‌, മഹാരാജാസ്‌ കോളേജ്‌ ഗേറ്റിനുമുന്നില്‍ പോലീസ്‌ തടഞ്ഞു. തുടര്‍ന്ന്‌ നടന്ന ഉദ്‌ഘാടനച്ചടങ്ങിനുശേഷം നേതാക്കള്‍ മടങ്ങിയതോടെ, പ്രവര്‍ത്തകരില്‍ ചിലര്‍ പോലീസിനുനേര്‍ക്ക്‌ കല്ലെറിഞ്ഞതോടെയാണ്‌ സംഘര്‍ഷാവസ്ഥയുണ്ടായത്‌.

ഇതിനിടെ യൂത്ത്‌ കോണ്‍ഗ്രസ്‌ ജില്ലാ പ്രസിഡന്റ്‌ പോളച്ചന്‍ മണിയങ്കോട്‌, സെക്രട്ടറി അന്‍വര്‍ സാദത്ത്‌ എന്നിവരുടെ നേതൃത്വത്തില്‍ ചിലര്‍ ബാരിക്കേഡിന്‌ മുകളിലൂടെ ചാടി, പോലീസ്‌വലയം ഭേദിക്കാന്‍ ശ്രമിച്ചു. ഇതോടെയാണ്‌ പോലീസ്‌ ജലപീരങ്കിയും കണ്ണീര്‍വാതക ഷെല്ലുകളും പ്രയോഗിച്ചത്‌.

ഷെല്ലുകളും ഗ്രനേഡുകളും പ്രയോഗിക്കാന്‍കഴിയുന്ന ആധുനിക പോലീസ്‌വാഹനം 'വജ്ര'യുടെ ആദ്യ പ്രയോഗവും യൂത്ത്‌ കോണ്‍ഗ്രസ്‌ പ്രവര്‍ത്തകര്‍ക്കുനേര്‍ക്ക്‌ നടത്തി. ഒരു റൗണ്ട്‌ കണ്ണീര്‍വാതക ഷെല്ലുകളാണ്‌ വജ്രയില്‍നിന്ന്‌ പ്രയോഗിച്ചത്‌. ജലപീരങ്കി ഘടിപ്പിച്ചിട്ടുള്ള 'വരുണ്‍' എന്ന വാഹനവും പോലീസ്‌ ഉപയോഗിച്ചു. ഇതിനുപുറമെ തോക്കുകള്‍ ഉപയോഗിച്ചും കണ്ണീര്‍വാതക ഷെല്ലുകളും പൊട്ടിച്ചു. ഏതാണ്ട്‌ 15 മിനിട്ടോളം മഹാരാജാസ്‌ കോളേജിന്‌ മുന്നിലെ റോഡില്‍ സംഘര്‍ഷം നിലനിന്നു.

പോലീസ്‌ പ്രയോഗങ്ങള്‍ അവസാനിച്ചതോടെ വീണ്ടും റോഡില്‍ ഒത്തുചേര്‍ന്ന പ്രവര്‍ത്തകര്‍ മുദ്രാവാക്യങ്ങള്‍ വിളിച്ച്‌ ഡി.സി.സി. ഓഫീസിലേക്ക്‌ മടങ്ങി. പോലീസ്‌സേനയും ഇവരെ പിന്തുടര്‍ന്നു. മാര്‍ച്ചും സംഘര്‍ഷവും മൂലം ഈഭാഗത്ത്‌ ഒന്നരമണിക്കൂറോളം ഗതാഗതതടസ്സം നേരിട്ടു.

യൂത്ത്‌ കോണ്‍ഗ്രസ്‌ ജില്ലാ പ്രസിഡന്റ്‌ പോളച്ചന്‍ മണിയങ്കോട്‌, സെക്രട്ടറി അന്‍വര്‍ സാദത്ത്‌, വൈസ്‌ പ്രസിഡന്റ്‌ സെബാസ്റ്റ്യന്‍ മങ്കുഴി എന്നിവരെയാണ്‌ ഇന്ദിരാഗാന്ധി സഹകരണ ആസ്‌പത്രിയില്‍ പ്രവേശിപ്പിച്ചത്‌. പൊട്ടിച്ചിതറിയ ഷെല്‍ കഷണങ്ങള്‍ ദേഹത്ത്‌ തറച്ചും ജലപീരങ്കി പ്രയോഗത്തില്‍ റോഡിലേക്ക്‌ വീണുമാണ്‌ ഇവര്‍ക്ക്‌ പരിക്കേറ്റത്‌.

കെ.പി.സി.സി. ജനറല്‍ സെക്രട്ടറി ബെന്നി ബെഹനാന്‍ മാര്‍ച്ച്‌ ഉദ്‌ഘാടനംചെയ്‌തു. നേതാക്കളായ വി.ഡി. സതീശന്‍ എം.എല്‍.എ., ഡൊമിനിക്‌ പ്രസന്‍േറഷന്‍, ടോണി ചമ്മണിയോടത്ത്‌, ബെന്നി ബഹനാന്‍, യൂത്ത്‌ കോണ്‍ഗ്രസ്‌ സംസ്ഥാന പ്രസിഡന്റ്‌ ഹൈബി ഈഡന്‍, നേതാക്കളായ ടി. സിദ്ദിഖ്‌, തമ്പി സുബ്രഹ്മണ്യം, മുഹമ്മദ്‌ ഷിയാസ്‌, മനോജ്‌ മൂത്തേടന്‍ തുടങ്ങിയവര്‍ മാര്‍ച്ചിന്‌ നേതൃത്വംനല്‍കി.