മാധ്യമങ്ങള്‍ വിട്ടുനില്‍ക്കരുത്

ബിആര്‍പി ഭാസ്കര്‍ (മാതൃഭൂമി സെപ്തംബര്‍ 20)

ജീവിച്ചിരുന്ന മുപ്പതില്‍പ്പരം കൊല്ലക്കാലത്ത് ഉണ്ടാക്കാനാകാഞ്ഞ ചലനങ്ങളാണ് കൊല്ലപ്പെട്ട ശേഷമുള്ള മൂന്നാഴ്ചക്കാലത്ത് പോള്‍ എം. മുത്തൂറ്റ് സൃഷ്ടിച്ചിട്ടുള്ളത്. മരിച്ച മനുഷ്യനല്ല മാധ്യമങ്ങളാണ് ചലനങ്ങള്‍ സൃഷ്ടിക്കുന്നതെന്ന് വേണമെങ്കില്‍ വാദിക്കാം. മാധ്യമങ്ങള്‍ മനസ്സുവെച്ചാല്‍ അലയടി തീര്‍ച്ചയായും ശമിക്കും. പക്ഷേ, അത് ചെയ്യുക ഗുണമാകുമോ ദോഷമാകുമോ? ഈ ചോദ്യത്തിന് ഉത്തരം തേടും മുമ്പ് ഈ കാലയളവിലെ സംഭവവികാസങ്ങള്‍ പരിശോധിക്കേണ്ടിയിരിക്കുന്നു.
ഒരു വലിയ ബിസിനസ്സ് കുടുംബത്തിലെ അംഗത്തിന്റെ കൊലപാതകം വലിയ വാര്‍ത്തയാണ്. സമീപകാല മാധ്യമ പ്രവണതകളുടെ വെളിച്ചത്തില്‍ നോക്കുമ്പോള്‍ അത് ആഘോഷത്തിന്റെ സ്വഭാവം കൈവരിക്കുന്നത് മനസ്സിലാക്കാവുന്നതുമാണ്. എന്നാല്‍ പോളിന്റെ കൊലപാതകം വളരെവേഗം പതിവില്‍ കവിഞ്ഞ പ്രാധാന്യം നേടി. തുടര്‍ന്ന് മാധ്യമരംഗത്ത് വ്യക്തമായ ചേരിതിരിവും പ്രത്യക്ഷപ്പെട്ടു. രാഷ്ട്രീയ വിവാദങ്ങളില്‍ പതിവായിക്കണ്ടുവരുന്ന തരത്തിലുള്ള ചേരിതിരിവായിരുന്നു അത്. ഭൂരിപക്ഷം പത്രങ്ങളും വാര്‍ത്താചാനലുകളും കൊലപാതകം സംബന്ധിച്ച പോലീസ് ഭാഷ്യത്തെക്കുറിച്ച് സംശയം ജനിപ്പിക്കുന്ന വാര്‍ത്തകള്‍ നല്‍കിയപ്പോള്‍ സി.പി.എം. നിയന്ത്രണത്തിലുള്ള പത്രവും ചാനലും എല്ലാം ഭദ്രമാണെന്നും മറ്റ് മാധ്യമങ്ങള്‍ പ്രശ്‌നം സൃഷ്ടിക്കുകയാണെന്ന് സ്ഥാപിക്കാനും ശ്രമിച്ചു.

അടിസ്ഥാനപരമായി മലയാള മാധ്യമങ്ങള്‍ക്കിടയില്‍ രാഷ്ട്രീയ വ്യത്യാസങ്ങളെ മറികടക്കുന്ന ഒരു പൊതുശൈലി രണ്ടു പതിറ്റാണ്ടിലേറെയായി നിലനില്‍ക്കുന്നുണ്ട്. കുപ്രസിദ്ധമായ ഐ.എസ്.ആര്‍.ഒ. ചാരക്കേസ് അവതരിപ്പിച്ചത് ദേശാഭിമാനി ആയിരുന്നു. സ്ത്രീശാസ്ത്രചാരവൃത്തി മിശ്രിതത്തിന്റെ സാധ്യതകള്‍ തിരിച്ചറിഞ്ഞ് മറ്റ് പത്രങ്ങള്‍ ഓടിയെത്തി. ആ കൂട്ടയോട്ടത്തില്‍ പങ്കെടുക്കാന്‍ ദൃശ്യമാധ്യമങ്ങള്‍ ഉണ്ടായിരുന്നില്ല. ആകെയുണ്ടായിരുന്നത് ഏഷ്യാനെറ്റ് ആണ്. അത് ചാരക്കഥയെ ചോദ്യം ചെയ്തു. മിക്ക പത്രങ്ങളും കാലക്രമത്തില്‍ തെറ്റ് മനസ്സിലാക്കി ഒന്നൊന്നായി പിന്‍വാങ്ങി. പോള്‍ വധക്കേസില്‍ ചേരിതിരിഞ്ഞു നില്‍ക്കുന്ന ചാനലുകള്‍ ഏതോ തത്പരകക്ഷികള്‍ വെച്ചുനീട്ടിയ അഭയ കേസ് പ്രതികളുടെ നാര്‍ക്കോ പരിശോധനാ സി.ഡി.കള്‍ മനുഷ്യാവകാശതത്ത്വങ്ങള്‍ അവഗണിച്ചുകൊണ്ട് അത്യുത്സാഹത്തോടെ സംപ്രേഷണം ചെയ്തത് പത്രധര്‍മത്തിന്റെ കാര്യത്തില്‍ അവര്‍ക്കിടയില്‍ കാര്യമായ അഭിപ്രായ വ്യത്യാസമില്ലെന്ന് സൂചിപ്പിക്കുന്നു. പോള്‍ വധക്കേസില്‍ ഭിന്ന സമീപനങ്ങളുടെ പിന്നില്‍ രാഷ്ട്രീയകാരണങ്ങളാണ്.

ഈ കേസിനെക്കുറിച്ച് സംസാരിക്കാന്‍ എട്ടു ദിവസത്തില്‍ രണ്ട് തവണയാണ് സി.പി.എം. സംസ്ഥാന സെക്രട്ടറി മാധ്യമപ്രവര്‍ത്തകരെ വിളിച്ചുവരുത്തിയത്. ആഗസ്ത് 21 (വെള്ളി) അര്‍ധരാത്രിക്കുശേഷമാണ് കൊലപാതകം നടന്നത്. ആഗസ്ത് 24 (തിങ്കള്‍) അന്വേഷണസംഘത്തെ നയിക്കുന്ന ഐ.ജി. വിന്‍സന്‍ എം. പോള്‍ പോലീസിന്റെ നിഗമനങ്ങള്‍ മാധ്യമങ്ങളെ അറിയിച്ചു.

ഐ.ജി.യുടെ വെളിപ്പെടുത്തലുകളെ സംശയദൃഷ്ടിയോടെ വീക്ഷിക്കാന്‍ വേണ്ടുവോളം കാരണമുണ്ടായിരുന്നു. ധാര്‍മികരോഷം പൂണ്ട് ക്വട്ടേഷന്‍ സംഘം ഏറ്റെടുത്ത ദൗത്യം മാറ്റിവെച്ച് മുന്‍പരിചയമില്ലാത്ത ബൈക്ക് യാത്രക്കാരന് സൗജന്യമായി നീതി വാങ്ങിക്കൊടുക്കാന്‍ ചാടിപ്പുറപ്പെട്ടെന്നത് സാമാന്യബുദ്ധിക്ക് നിരക്കുന്നതല്ല. പോളിനോടൊപ്പം സഞ്ചരിച്ചിരുന്ന മനു എന്നൊരാള്‍ക്കും കുത്തേറ്റിരുന്നു. അയാളെ കൂടാതെ തിരുവനന്തപുരം പൊലീസിന്റെ ഗുണ്ടാലിസ്റ്റില്‍ പെട്ട ഓംപ്രകാശ്, രാജേഷ് എന്നിവരും പോളിനൊപ്പമുണ്ടായിരുന്നെന്നും അവര്‍ ഒളിവിലാണെന്നും ഐ.ജി. പറഞ്ഞു. അവരെ കൂടി കണ്ടെത്തി ചോദ്യം ചെയ്യുന്നതിനുമുമ്പ് ഐ.ജി. സംഭവം രോഷപ്രകടനമായിരുന്നെന്നും ഗൂഢാലോചന ഉണ്ടായിരുന്നില്ലെന്നുമുള്ള നിഗമനത്തില്‍ എങ്ങനെയാണ് എത്തിച്ചേര്‍ന്നത്? എന്തിനാണ് അദ്ദേഹം മൂന്നാം ദിവസം തന്നെ അന്വേഷണം വിജയകരമായി പൂര്‍ത്തീകരിച്ചിരിക്കുന്നെന്ന ധാരണ നല്‍കാന്‍ ശ്രമിച്ചത്? ഈവിധ സംശയങ്ങള്‍ മാധ്യമ റിപ്പോര്‍ട്ടുകളില്‍ പ്രതിഫലിച്ച ഘട്ടത്തിലാണ് പാര്‍ട്ടി സെക്രട്ടറി ആഗസ്ത് 26 ന് രംഗപ്രവേശം നടത്തിയത്. രണ്ടു കാര്യങ്ങള്‍ അദ്ദേഹം പറഞ്ഞു. 'ട' കത്തി ആര്‍.എസ്.എസ്സുകാര്‍ ഉപയോഗിക്കാറുള്ള ഒന്നാണ്. ഏഴ് കൊല്ലം മുമ്പ് ഡല്‍ഹിയില്‍ മയക്കുമരുന്ന്‌കേസില്‍ പിടികൂടപ്പെട്ട പോളിന്റെ ഭൂതകാലത്തെ കുറിച്ച് മാധ്യമങ്ങാള്‍ അന്വേഷിക്കണം.

പോലീസ് അന്വേഷണത്തിലൂടെയും മാധ്യമ റിപ്പോര്‍ട്ടുകളിലൂടെയും പ്രസക്തമായ വിവരങ്ങള്‍ പുറത്തുവരുന്നില്ലെന്ന ചിന്തയല്ല അദ്ദേഹത്തെ പത്രസമ്മേളനം നടത്താന്‍ പ്രേരിപ്പിച്ചത്. അങ്ങനെയൊരു ചിന്ത അദ്ദേഹത്തെ അലട്ടിയിരുന്നെങ്കില്‍ പരിഹാരം കാണാന്‍ അദ്ദേഹത്തിന്റെ ഉത്തരവുകള്‍ പാലിക്കാന്‍ ബാധ്യസ്ഥരായ ആഭ്യന്തരമന്ത്രി കോടിയേരി ബാലകൃഷ്‌നന്‍, ദേശാഭിമാനി പത്രാധിപര്‍ വി.വി. ദക്ഷിണാമൂര്‍ത്തി, കൈരളി മാനേജിങ് എഡിറ്റര്‍ ജോണ്‍ ബ്രിട്ടാസ് എന്നിവരോട് സംസാരിച്ചാല്‍ മതിയായിരുന്നു. അദ്ദേഹത്തിന്റെ പത്രസമ്മേളനം ഒരു രാഷ്ട്രീയ ഇടപെടലായിരുന്നു. പല മാധ്യമങ്ങളും ഗുണ്ടകള്‍ക്ക് സി.പി.എം. ബന്ധമുണ്ടെന്ന് ആരോപിക്കുകയും മന്ത്രിപുത്രന്റെ പേര്‍ പൊങ്ങിവരികയും ചെയ്ത സാഹചര്യത്തില്‍ സൂചിമുന രാഷ്ട്രീയഎതിരാളികളിലേക്ക് തിരിച്ചു വിടാനാണ് പാര്‍ട്ടി സെക്രട്ടറി രണ്ട് ഇടപെടലുകളും നടത്തിയത്. അതിനായി അദ്ദേഹത്തിന്റെ ചേകോന്മാരും ഇറങ്ങിപ്പുറപ്പെട്ടു.

ദിവസേന പുറത്തുവന്നുകൊണ്ടിരുന്ന വിവരങ്ങള്‍ ഭരണകക്ഷിയെ അസ്വസ്ഥമാക്കിയതു കൊണ്ടാണ് പാര്‍ട്ടി സെക്രട്ടറി ഇടപെട്ടതും മാധ്യമങ്ങള്‍ അന്വേഷണം നടത്തേണ്ടെന്ന് ആഭ്യന്തരമന്ത്രി പ്രഖ്യാപിച്ചതും. മുമ്പ് പല അവസരങ്ങളിലും സംഭവിച്ചതുപോലെ ഈ കേസിന്റെ അന്വേഷണ ഘട്ടത്തിലും ചില പോലീസുദ്യോഗസ്ഥരും ചില മാധ്യമങ്ങളും താന്താങ്ങളുടെ തൊഴില്‍ മര്യാദകള്‍ മറന്നുകൊണ്ട് പ്രവര്‍ത്തിച്ചുവെന്ന് കാണാന്‍ പ്രയാസമില്ല. അതേസമയം സ്വതന്ത്ര മാധ്യമ പ്രവര്‍ത്തനത്തിന് ഗുണപരമായ പങ്ക് വഹിക്കാന്‍ ഇപ്പോഴും കഴിയുന്നുണ്ട്. 'ട' കത്തിയെക്കുറിച്ച് ഐ.ജി. പറഞ്ഞശേഷം അന്വേഷണസംഘത്തിലെ ഉദ്യോഗസ്ഥന്‍ കൊല്ലനെക്കൊണ്ട് അത്തരത്തിലുള്ള കത്തി ഉണ്ടാക്കിപ്പിച്ചുവെന്ന ഏഷ്യാനെറ്റ് ന്യൂസിന്റെ വിശ്വാസയോഗ്യമായ വെളിപ്പെടുത്തല്‍ ഇത് സാക്ഷ്യപ്പെടുത്തുന്നു.



മാധ്യമങ്ങളുടെയും പോലീസുദ്യോഗസ്ഥരുടെയും വീഴ്ചകളേക്കാള്‍ പ്രധാനമാണ് ഈ കേസിന്റെ അന്വേഷണത്തില്‍ മുഖ്യഭരണകക്ഷിക്കുള്ള പ്രകടമായ താത്പര്യം. നല്ല രീതിയില്‍ അന്വേഷണം നടത്തിയ പോലീസിനെ അഭിനന്ദിക്കുന്നതിനു പകരം നിന്ദിക്കുന്നുവെന്ന് പാര്‍ട്ടി സെക്രട്ടറി പറയുന്നു. അന്വേഷണം ശരിയായ ദിശയിലാണ് പോകുന്നതെന്നും പോലീസ് പിടികൂടിയവര്‍തന്നെയാണ് യഥാര്‍ഥ കുറ്റവാളികളെന്നും അദ്ദേഹവും സാമന്തന്മാരും ആവര്‍ത്തിക്കുന്നത് എന്തടിസ്ഥാനത്തിലാണ്? ''പൊലീസ് ഞങ്ങള്‍ക്ക് പുല്ലാണ്'' എന്ന് പാടിനടന്നവര്‍ പോലീസില്‍ വിശ്വാസമുള്ളവരായി പരിണമിച്ചതെങ്ങനെയാണ്? പോലീസിന്റെ നിയന്ത്രണം ഇപ്പോള്‍ അവരുടെ കൈകളിലാണ് എന്നതാണ് ഈ ചോദ്യത്തിനുള്ള ലളിതമായ ഉത്തരം. അവര്‍ ആഗ്രഹിക്കുന്ന ദിശയില്‍ അന്വേഷണം നീങ്ങുന്നു. അതുകൊണ്ട് അത് നല്ല രീതിയിലുള്ള അന്വേഷണമാകുന്നു!

അന്വേഷണം ശരിയായ രീതിയിലാണ് നടക്കുന്നതെന്ന് ഹൈക്കോടതി പറഞ്ഞിട്ടുണ്ടെന്ന സി.പി.എം. നേതാക്കളുടെ പ്രസ്താവം പച്ചക്കള്ളമാണ്. കോടതി സി.ബി.ഐ. അന്വേഷണം ആവശ്യപ്പെട്ടുകൊണ്ടുള്ള ഹര്‍ജി തള്ളിയത് പ്രാരംഭഘട്ടത്തില്‍ ഇടപെടാനാവില്ലെന്നു പറഞ്ഞുകൊണ്ടാണ്. അന്വേഷണത്തിന്റെ ഗതിയെക്കുറിച്ച് അത് ഒരു നിഗമനത്തിലും എത്തിയിട്ടില്ലെന്ന് ഹര്‍ജിക്കാര്‍ക്ക് വേണമെങ്കില്‍ വീണ്ടും കോടതിയെ സമീപിക്കാമെന്ന നിരീക്ഷണം വ്യക്തമാക്കുന്നു.

പോള്‍ വധക്കേസിനെ മറ്റ് വിവാദമായ കൊലക്കേസുകളില്‍ നിന്ന് വ്യത്യസ്തമാക്കുന്ന ഒരു ഘടകമുണ്ട്. അത് ഈ കൊല കുറ്റകൃത്യവും ബിസിനസ്സും രാഷ്ട്രീയവും ഒന്നിക്കുന്ന മേഖലയിലേക്ക് അല്പം വെളിച്ചം വീശുന്നുവെന്നതാണ്. കുറ്റവാളികളും ബിസിനസ്സുകാരും രാഷ്ട്രീയ സ്വാധീനം ആഗ്രഹിക്കുന്നവരാണ്. സ്വാഭാവികമായും അവര്‍ക്ക് താത്പര്യം വലിയ കക്ഷികളിലാണ്. കൂടുതല്‍ വലിയകക്ഷി അവരെ കൂടുതല്‍ ആകര്‍ഷിക്കുന്നു. ഇന്ന് കേരളത്തില്‍ അവരെ ആകര്‍ഷിക്കാന്‍ കോണ്‍ഗ്രസ്സിനേക്കാള്‍ കഴിവുള്ള

കക്ഷി സി.പി.എം. ആണ്. അതുകൊണ്ടാണ് വ്യാജമദ്യക്കേസും ഗൂണ്ടാക്കേസുമൊക്കെ ഉണ്ടാകുമ്പോള്‍ സി.പി.എമ്മിന്റെ പേര്‍ ഉയര്‍ന്നുവരുന്നത്.



ചെറിയ തോതിലുള്ള അക്രമരാഷ്ട്രീയത്തിന്റെ നീണ്ട പാരമ്പര്യമുള്ള സംസ്ഥാനമാണ് നമ്മുടേത്. ഇവിടെ ഇപ്പോള്‍ വിളയാടുന്ന മാഫിയാ പ്രവര്‍ത്തനങ്ങളുടെ ആവിര്‍ഭാവത്തില്‍ പ്രമുഖ രാഷ്ട്രീയ കക്ഷികള്‍ക്ക് പങ്കുണ്ട്. പാര്‍ട്ടികള്‍ക്കുവേണ്ടി അക്രമപ്രവര്‍ത്തനത്തിലേര്‍പ്പെട്ടവര്‍ കാലക്രമത്തില്‍ അതില്‍ ഹരംപിടിച്ച് കൂലിത്തല്ലുകാരായി മാറിയതിന് നിരവധി ഉദാഹരണങ്ങളുണ്ട്. അച്ചടക്കബോധമുള്ള പാര്‍ട്ടികള്‍ ഇങ്ങനെയുള്ളവര്‍ക്കെതിരെ ശിക്ഷാനടപടികള്‍ എടുക്കാറുണ്ടെങ്കിലും പലപ്പോഴും അവര്‍ക്ക് പാര്‍ട്ടിബന്ധം അനൗപചാരികമായി തുടരാനും പിന്നീട് പുനഃസ്ഥാപിക്കാനും കഴിയാറുണ്ട്.

മറ്റ് പല സംസ്ഥാനങ്ങളിലുമെന്ന പോലെ കേരളത്തിലും പോലീസ് രാഷ്ട്രീയവത്കരിക്കപ്പെട്ടിട്ടുണ്ട്. പോലീസ് സേനയില്‍ രാഷ്ട്രീയ കക്ഷികളില്‍ അംഗത്വമുള്ളവരുണ്ടെന്നത് പരസ്യമായിട്ടുള്ള വസ്തുതയാണ്. പോലീസ് സംഘടനാ തിരഞ്ഞെടുപ്പില്‍ രാഷ്ട്രീയച്ചുവ പ്രത്യക്ഷപ്പെട്ടു തുടങ്ങിയിട്ടുമുണ്ട്.

ജനാധിപത്യവ്യവസ്ഥയ്ക്ക് വെല്ലുവിളി ഉയര്‍ത്തുന്ന രാഷ്ട്രീയ, ക്രിമിനല്‍, ബിസിനസ്സ് കൂട്ടായ്മയെ തുറന്നുകാട്ടാന്‍ മാധ്യമങ്ങള്‍ക്കുള്ള കഴിവ് മറ്റൊരു സ്ഥാപനത്തിനുമില്ല.

അവര്‍ ആ ചുമതലയില്‍ നിന്ന് സ്വയമേവയോ സമ്മര്‍ദത്തിന്റെ ഫലമായോ വിട്ടുനിന്നാല്‍ ദോഷമേ ഉണ്ടാകൂ. ഈ പശ്ചാത്തലത്തില്‍ പോള്‍ വധക്കേസിന്റെ അന്വേഷണ പുരോഗതി പൊതുസമൂഹം സൂക്ഷ്മമായി വീക്ഷിക്കേണ്ടതുണ്ട്. വിവരങ്ങള്‍ ശേഖരിച്ച് വിതരണം ചെയ്യുന്ന സ്ഥാപനങ്ങള്‍ എന്ന നിലയ്ക്ക് ഇക്കാര്യത്തില്‍ മാധ്യമങ്ങള്‍ക്ക് ഒരു വലിയ പങ്ക് വഹിക്കാനുണ്ട്. ഉയര്‍ന്ന പത്രധര്‍മതത്ത്വങ്ങള്‍ പാലിച്ചുകൊണ്ടാണ് അവര്‍ ഈ കടമ നിര്‍വഹിക്കേണ്ടത്. ഈ തത്ത്വങ്ങളില്‍ നിന്ന് വ്യതിചലിക്കാനുള്ള പ്രവണത പ്രകടമാകുമ്പോള്‍ അത് തടയപ്പെടണം. അത് ചെയ്യേണ്ടത് മാധ്യമ നേതൃത്വങ്ങള്‍ തന്നെയാണ്.