കല്ലേറുകള്‍ക്കിടയിലെ മാധ്യമധര്‍മം
അപ്പുക്കുട്ടന്‍ വള്ളിക്കുന്ന് (17 സെപ്തംബര്‍ 2009, മാതൃഭൂമി)
മാ ധ്യമങ്ങളുടെ ചുമതലയും ഇടപെടലും ബോധ്യപ്പെടുത്തിയ രണ്ട്‌ സംഭവങ്ങള്‍ കഴിഞ്ഞ ദിവസങ്ങളിലുണ്ടായി. രൂക്ഷമായ വരള്‍ച്ചയുടെ കെടുതികള്‍ നേരിടുന്ന സാഹചര്യത്തില്‍ ചെലവ്‌ പരമാവധി ചുരുക്കാന്‍ തീരുമാനമെടുത്ത യു.പി.എ. സര്‍ക്കാരിന്റെ വിദേശകാര്യമന്ത്രിമാര്‍ പഞ്ചനക്ഷത്രഹോട്ടലില്‍ താമസിക്കുന്നതിന്റെ വൈരുദ്ധ്യം ഒരു പത്രം പുറത്തുകൊണ്ടുവന്നു. ലക്ഷങ്ങളുടെ കുടിപാര്‍പ്പ്‌ ഉടന്‍ തന്നെ അവസാനിപ്പിക്കാന്‍ സഹപ്രവര്‍ത്തകരോട്‌ ആവശ്യപ്പെട്ടതായി ധനമന്ത്രി പത്രസമ്മേളനം വിളിച്ച്‌ അറിയിച്ചു. കോടിക്കണക്കില്‍ രൂപ ചെലവിട്ട്‌ യു.പി. സര്‍ക്കാര്‍ നടത്തിവരുന്ന പ്രതിമാനിര്‍മാണം സുപ്രീം കോടതി തടഞ്ഞിരുന്നു. എന്നിട്ടും സര്‍ക്കാര്‍ രഹസ്യമായി അതുതുടരുന്ന വിവരം 'ദി ഹിന്ദു' അടക്കമുള്ള ചില മാധ്യമങ്ങള്‍ പുറത്തുകൊണ്ടുവന്നു. സുപ്രീംകോടതി സ്വമേധയാ പുറപ്പെടുവിച്ച ഉത്തരവ്‌ അത്‌ തടഞ്ഞു.
എന്നാല്‍ ഇതേ ദിവസങ്ങളില്‍ തന്നെയാണ്‌ കേരളത്തില്‍ ചില ഭാഗത്തുനിന്ന്‌ അതിരൂക്ഷമായ വിമര്‍ശം മാധ്യമങ്ങള്‍ക്ക്‌ നേരെ ഉയര്‍ന്നത്‌.
പോള്‍ എം. ജോര്‍ജിന്റെ കൊലപാതക കേസ്‌ മാധ്യമങ്ങള്‍ അന്വേഷിക്കേണ്ടതില്ലെന്ന്‌ ആഭ്യന്തരമന്ത്രി. അത്തരം മാധ്യമങ്ങള്‍ക്കെതിരെ കേസെടുക്കാന്‍ പോലീസ് മടിക്കുന്നതെന്തിനെന്ന്‌ ആഭ്യന്തരമന്ത്രിയുടെ പാര്‍ട്ടിയുടെ സെക്രട്ടറി. പോലീസ് അന്വേഷണത്തിന്‌ സമാന്തരമായി മാധ്യമ അന്വേഷണം പാടില്ലെന്ന്‌ ചില മാധ്യമ വിശാരദന്മാര്‍. പത്രങ്ങള്‍ തെളിവുണ്ടാക്കാന്‍ ശ്രമിക്കരുതെന്ന്‌ മറ്റു ചിലര്‍. കേസിലെ മാധ്യമ വിചാരണയ്‌ക്കെതിരെ ഒരു ഘട്ടത്തില്‍ ഹൈക്കോടതിയുടെ പോലും പ്രതികരണം.
ക്രിമിനല്‍ നീതിനിര്‍വഹണം സ്വതന്ത്രമായിരിക്കണമെന്ന കാര്യത്തില്‍ ആരും വിയോജിക്കില്ല. ബാഹ്യഇടപെടലുകളില്ലാത്ത പോലീസ് അന്വേഷണം, പ്രതികള്‍ക്ക്‌ മാതൃകാപരമായ ശിക്ഷ ഉറപ്പുവരുത്തും വിധം കുറ്റമറ്റ പ്രോസിക്യൂഷന്‍, ബാഹ്യ സ്വാധീനങ്ങള്‍ക്ക്‌ ഇടവരാത്ത ക്രിമിനല്‍ നീതിനിര്‍വഹണം - ഇതാണ്‌ നിയമവാഴ്‌ചയുടെ ശരിയായ വഴി. അങ്ങനെ വരുമ്പോള്‍ നീതിനിര്‍വഹണ പ്രക്രിയയുടെ വിവരങ്ങള്‍ അതത്‌ ഘട്ടത്തില്‍ ജനങ്ങളെ അറിയിക്കുക എന്നതുമാത്രമായിരിക്കും മാധ്യമങ്ങളുടെ ജോലി എന്നതും ശരിതന്നെ. എന്നാല്‍ കേസന്വേഷണം മുതല്‍ ക്രിമിനല്‍ നീതിനിര്‍വഹണം പാളം തെറ്റിക്കുന്നു എന്നുവന്നാല്‍ മാധ്യമങ്ങള്‍ക്ക്‌ ഇടപെടേണ്ടി വരും. മറച്ചു പിടിക്കുന്നതെന്തോ അത്‌ കണ്ടുപിടിച്ച്‌ സമൂഹത്തെ അറിയിക്കുക എന്ന ദൗത്യമായി ജനിച്ചവയാണ്‌ മാധ്യമങ്ങള്‍. പോലീസിന്റെ അജന്‍ഡയില്‍ രൂപപ്പെട്ട നീതിനിര്‍വഹണം വഴിതെറ്റിയതിന്‍േറയും തുടര്‍ന്നുണ്ടായ മാധ്യമ ഇടപെടലുകളുടേയും ചരിത്രം നീണ്ടതാണ്‌. അവ വിസ്‌മരിച്ച്‌ മാധ്യമങ്ങളെ പ്രതിക്കൂട്ടിലേക്ക്‌ അടിച്ചുകയറ്റുന്നത്‌ ചോദ്യം ചെയ്യേണ്ടിവരും.
ഇപ്പോഴും കരപറ്റിയിട്ടില്ലാത്ത അഭയകേസിന്റെ ഒന്നരപതിറ്റാണ്ടിലേറെയായ അനുഭവചരിത്രം നമ്മുടെ മുമ്പിലുണ്ട്‌. 1970 ഫിബ്രവരി 18-ന്‌ തിരുനെല്ലി കാട്ടില്‍ പോലീസുമായുള്ള ഏറ്റുമുട്ടലില്‍ വര്‍ഗീസ്‌ കൊല്ലപ്പെട്ടെന്ന്‌ കേരളത്തിലെ മിക്ക മാധ്യമങ്ങളും റിപ്പോര്‍ട്ട്‌ ചെയ്‌തു. വര്‍ഗീസിനെ പോലീസ് വെടിവെച്ചുകൊന്നതാണെന്ന്‌ വിളിച്ചുപറഞ്ഞത്‌ രണ്ടേരണ്ടു പത്രങ്ങള്‍. 'ദേശാഭിമാനി'യും തായാട്ട്‌ ശങ്കരന്‍ പത്രാധിപരായിരുന്ന 'വിപ്ലവം' എന്ന കോഴിക്കോടന്‍ പത്രവും. തായാട്ടിന്‌ പത്രാധിപസ്ഥാനം രാജിവെക്കേണ്ടി വന്നു. പതിറ്റാണ്ടുകള്‍ക്കു ശേഷം പോലീസ് കോണ്‍സ്റ്റബിള്‍ പി. രാമചന്ദ്രന്‍ നായര്‍ നീതിപീഠത്തിനു മുമ്പില്‍ സത്യം വെളിപ്പെടുത്തി -കേരളം ഞെട്ടി.
രാജന്‍ കേസില്‍ അന്നത്തെ പോലീസ് മേധാവികളും ആഭ്യന്തരമന്ത്രി കരുണാകരനും ഈച്ചരവാര്യരുടെ മകന്‍ രാജനെ കസ്റ്റഡിയില്‍ എടുത്തിട്ടില്ലെന്നും കക്കയം ക്യാമ്പ്‌ തന്നെ ഉണ്ടായിരുന്നില്ലെന്നും ഹൈക്കോടതി മുമ്പാകെ സത്യവാങ്‌ മൂലം നല്‍കി. അതിന്റെ അടുത്ത ദിവസങ്ങളിലാണ്‌ രാജന്റെ കൊലപാതകവും കക്കയം ക്യാമ്പ്‌ സംബന്ധിച്ച അന്വേഷണ പരമ്പര ഈ ലേഖകനെഴുതിയത്‌. ഇന്നത്തെ ആഭ്യന്തരമന്ത്രിയുടെ നേതൃത്വത്തിലുള്ള യുവജനപ്രസ്ഥാനമാണ്‌ അന്നത്തെ ആഭ്യന്തരവകുപ്പിനേയും പോലീസ് അന്വേഷണത്തേയും തള്ളിപ്പറഞ്ഞ്‌ ഈച്ചരവാര്യരുടെ നേതൃത്വത്തില്‍ കാസര്‍കോട്‌ നിന്ന്‌ തിരുവനന്തപുരത്തേക്ക്‌ കാല്‍നട ജാഥ നടത്തിയത്‌.
ഐസ്‌ക്രീം പാര്‍ലര്‍ കേസില്‍ ഒരു ഇരയുടെ നാടകീയമായ രംഗപ്രവേശവും മാധ്യമ ഇടപെടലുകളും മറക്കാറായിട്ടില്ല. യു.ഡി.എഫ്. സര്‍ക്കാരിന്റെ പതനത്തിനും എല്‍.ഡി.എഫ്. സര്‍ക്കാരിന്റെ ഉദയത്തിനും അന്നത്തെ മാധ്യമ വിചാരണ എല്‍.ഡി.എഫ്. ഫലപ്രദമായി ഉപയോഗപ്പെടുത്തി. ബെസ്റ്റ്‌ ബേക്കറി കേസില്‍ സത്യം തെളിയിക്കാന്‍ തീസ്‌ത സെത്തല്‍വാദും മറ്റും നടത്തിയപോരാട്ടവും അതിന്‌ പത്രങ്ങളും സുപ്രീംകോടതി പോലും നല്‍കിയ പിന്തുണയും സാഹിറ ഷെയ്‌ഖിന്റെ കൂറുമാറ്റവും സമീപകാല സംഭവങ്ങളാണ്‌. പോലീസിന്റെ വിശുദ്ധിയും സര്‍ക്കാറിന്റെയും രാഷ്ട്രീയ നേതാക്കളുടേയും നിഷ്‌പക്ഷതയും കണ്ണടച്ച്‌ വിശ്വസിക്കാതിരിക്കാന്‍ ഈ അനുഭവങ്ങള്‍ ചരിത്രത്തില്‍ മുന്നറിയിപ്പാകുന്നു.
യു.ഡി.എഫ്. മാറി എല്‍.ഡി.എഫ്. വന്നാല്‍ ക്രിമിനല്‍ നീതിനിര്‍വഹണം കാര്യക്ഷമവും സംശുദ്ധമാകുമെന്നും നാളെ എല്‍.ഡി.എഫിന്‌ പകരം യു.ഡി.എഫോ ബി.ജെ.പി.യോ അധികാരമേറ്റാല്‍ നിയമവാഴ്‌ച പൂത്തുലയുമെന്നും സത്യത്തില്‍ ആരും കരുതുന്നില്ല. അതുകൊണ്ടു തന്നെ മാധ്യമങ്ങള്‍ക്ക്‌ കാവല്‍ നായ്‌ക്കളുടെ ജാഗ്രത കൂടിയേതീരൂ, സ്വാതന്ത്ര്യവും. എന്നാല്‍ മാധ്യമങ്ങള്‍ക്ക്‌ ചങ്ങലയും മുഖംമൂടിയും നിക്ഷിപ്‌ത താത്‌പര്യങ്ങളും അപക്വതയും ഒട്ടുമില്ലെന്ന ധാരണയിലല്ല ഈ പ്രതീക്ഷ. എന്തൊക്കെ പരിമിതികള്‍ ഉണ്ടെങ്കിലും മാധ്യമങ്ങളുടെ കണ്ണും വെളിച്ചവുമില്ലാത്ത ലോകം എന്താണെന്ന്‌ ഊഹിക്കാവുന്നതുകൊണ്ടാണ്‌ ഈനിലപാട്‌.
മുംബൈ അധോലോകത്തെ ഒന്നരപ്പതിറ്റാണ്ട്‌ കാലത്തെ മാഫിയ വളര്‍ച്ചയെ സംബന്ധിച്ച്‌ ലിസ വെയ്‌ന്‍സ്‌റ്റീന്‍ നടത്തിയ പഠനമുണ്ട്‌. കള്ളക്കടത്തിന്റെ ആ ലോകം ഉദാരീകരണവുമായി ബന്ധപ്പെട്ട്‌ മാഫിയയായി വളര്‍ന്നതിനെപ്പറ്റി. അതിലേക്ക്‌ നയിച്ച നഗരവികസനവും റിയല്‍ എസ്റ്റേറ്റും ഭൂവികസനവുമായുള്ള സുദൃഢബന്ധത്തെക്കുറിച്ച്‌. രാഷ്ട്രീയക്കാരും പോലീസും ബ്യൂറോക്രാറ്റും ക്രിമിനലുകളും ചേര്‍ന്നുള്ള മുന്നണി നിലവില്‍ വന്നതിനെപ്പറ്റി. ഈ ക്രിമിനല്‍ വ്യവസായമാണ്‌ റിയല്‍ എസ്റ്റേറ്റും ഭൂബാങ്കുകളുമായി ബന്ധപ്പെട്ട്‌ 2000-ത്തോടെ കേരളത്തിലും വ്യാപകമായത്‌. ഈ സമാന്തര ക്രിമിനല്‍ വ്യവസായത്തില്‍ നിന്നും ഭരണകൂട്ടുകെട്ടില്‍ നിന്നും ഒഴിഞ്ഞുനില്‍ക്കാന്‍ വയ്യാത്ത അവസ്ഥയിലാണ്‌ ഇപ്പോള്‍ കേരളത്തില്‍ ഭരണപക്ഷത്തും പ്രതിപക്ഷത്തുമുള്ള രാഷ്ട്രീയ പാര്‍ട്ടികള്‍.
പോള്‍ എം. ജോര്‍ജിന്റെ കൊലപാതകവുമായി ബന്ധപ്പെട്ട്‌ കേരളം കണ്ടത്‌ പുതിയ ക്രിമിനല്‍ ലോകത്തിന്റെ ഈ സാന്നിധ്യമാണ്‌. സമകാലിക കേരളാവസ്ഥ എന്താണെന്നതിനെക്കുറിച്ചുള്ള മുന്നറിയിപ്പാണ്‌ തുടര്‍ന്ന്‌ പുറത്തുവന്ന മാഫിയാബന്ധങ്ങളുടെ വിവരങ്ങള്‍. മാധ്യമവിചാരണയും വിവാദവും കൊഴുപ്പിച്ചത്‌ ഭരണ-പ്രതിപക്ഷ രാഷ്ട്രീയ നേതാക്കള്‍ തന്നെയാണ്‌. കേസിലെ സത്യം പുറത്തു കൊണ്ടുവരാനാണെന്ന്‌ പരസ്‌പരം അവകാശപ്പെട്ട്‌. മാധ്യമ വിചാരണയെപ്പറ്റി ആവലാതിപ്പെടുന്നവര്‍ തന്നെയാണ്‌ അതിന്‌ തുടക്കം കുറിച്ചത്‌. എസ് കത്തിയും ആര്‍.എസ്.എസ്സും വലിച്ചിടുക മാത്രമല്ല അവരെക്കുറിച്ച്‌ അന്വേഷിക്കണമെന്ന്‌ മാധ്യമങ്ങളോട്‌ നിര്‍ദേശിക്കുകപോലും ചെയ്‌തു. മന്ത്രിപുത്രന്‍ ആരാണെന്ന്‌ വെളിപ്പെടുത്തണമെന്നും. പ്രതിപക്ഷവും അവരുടെ ആവനാഴിയിലുള്ള എല്ലാ മലിനാസ്‌ത്രങ്ങളും തിരഞ്ഞെടുപ്പ്‌ പ്രചാരണരംഗത്തെന്ന പോലെ നിര്‍ബാധം ഉപയോഗിച്ചു. പോലീസിനേയും പോലീസ് മന്ത്രിയേയും സംരക്ഷിക്കാന്‍ മാത്രമായിരുന്നെങ്കില്‍ പാര്‍ട്ടി സെക്രട്ടറി രംഗത്തുവരേണ്ടിയിരുന്നില്ല. പ്രതിപക്ഷം തുമ്മിയാല്‍ തെറിക്കുന്ന മൂക്കല്ലല്ലോ പോലീസിന്‍േറയും ആഭ്യന്തരമന്ത്രിയുടേയും. എല്ലാ സീമകളും കടന്ന്‌ രാഷ്ട്രീയ കക്ഷി നേതാക്കളെ പ്രത്യേകം തിരഞ്ഞുപിടിച്ച്‌ വെല്ലുവിളിക്കുകയും പരസ്‌പര ആരോപണത്തിന്റെ മാലിന്യം കോരിയൊഴിക്കുകയും ചെയ്യുന്നു. എന്തൊരു രാഷ്ട്രീയ മലിനീകരണം.
കൊല്ലപ്പെടുന്ന ആളുടെയോ പ്രതിയായി പോലീസ് കണ്ടെത്തിയ ആളുകളുടെയോ പൂര്‍വകാലചരിത്രമല്ല ക്രിമിനല്‍ നീതി നിര്‍വഹണത്തിലെ നിര്‍ണായക ഘടകങ്ങള്‍. കൊലപാതകവുമായി ബന്ധപ്പെട്ട പങ്കാളിത്തവും തെളിവുമാണ്‌. കൊല്ലപ്പെട്ട വ്യക്തിയുടെ കുടുംബത്തിന്റെ മാന്യതയേയും സ്വകാര്യതയേയും തകര്‍ക്കുകയും അവഹേളിക്കുകയും ചെയ്യുന്നത്‌ മാന്യതയല്ല. തെളിവുകളുടെയോ സംശയത്തിന്റെ ആനൂകൂല്യത്തിലോ പ്രതികളെ ശിക്ഷിക്കുകയോ വിട്ടയയ്‌ക്കുകയോ ചെയ്യേണ്ടത്‌ കോടതിയാണ്‌. ഈ വിശേഷാല്‍ അധികാരം രാഷ്ട്രീയപ്പാര്‍ട്ടി നേതാക്കള്‍ കവര്‍ന്നുകൂടാ. അവ പാലിക്കാന്‍ ബാധ്യത ഭരണകക്ഷി നേതാക്കള്‍ക്കാണ്‌.
ഭരണ രാഷ്ട്രീയക്കാര്‍ക്ക്‌ ഇഷ്‌ടപ്പെടാത്ത തെളിവുകള്‍ മാധ്യമങ്ങളില്‍ വന്നതോടെ ഉണ്ടായ പ്രകോപനം വ്യക്തമാണ്‌. മാധ്യമ പ്രവര്‍ത്തകര്‍ക്കെതിരെ കേസെടുക്കണം എന്നപാര്‍ട്ടി നേതൃത്വത്തിന്റെ ആവശ്യം റിപ്പോര്‍ട്ടുകളുടെ പേരില്‍ പത്രപ്രവര്‍ത്തകര്‍ക്ക്‌ പോലീസ് നോട്ടീസ്‌ നല്‍കുമെന്ന ആഭ്യന്തരമന്ത്രിയുടെ പ്രഖ്യാപനം വരെയെത്തി. ഇതുസംബന്ധിച്ച തമിഴ്‌നാട്‌മാതൃക എന്തായാലും പത്രസ്വാതന്ത്ര്യത്തില്‍ കൈകടത്താനുള്ള നീക്കമായി അത്‌. യഥാര്‍ഥത്തില്‍ പോലീസിന്റെയും മാധ്യമങ്ങളുടെയും കേസന്വേഷണങ്ങള്‍ പരസ്‌പരപൂരകമാകേണ്ടതാണ്‌. പൊതുജന താത്‌പര്യത്തിന്‌ വേണ്ടത്ര വിവരങ്ങള്‍ മാധ്യമങ്ങള്‍ക്ക്‌ നല്‍കുക, തെളിവുകളെ ബാധിക്കാവുന്ന വിവരങ്ങള്‍ മാധ്യമങ്ങളില്‍ വരാതെ നോക്കുക, അങ്ങനെ മാധ്യമങ്ങളെ ഫലപ്രദമായി സഹകരിപ്പിച്ചും ഉപയോഗപ്പെടുത്തിയും കൊണ്ടുപോകലാണ്‌ പോലീസ് അന്വേഷണത്തിലെ യഥാര്‍ഥ മിടുക്ക്‌. അന്വേഷണം തകര്‍ക്കാനും മാഫിയകളേയും ഗുണ്ടകളേയും സഹായിക്കാനും കേരളത്തിലെ മാധ്യമങ്ങള്‍ മാറിക്കഴിഞ്ഞു എന്ന്‌ ആരുപറഞ്ഞാലും ജനങ്ങള്‍ തത്‌കാലം വിശ്വസിക്കില്ല.
ലോകത്തിന്‌ മാതൃകയായ ലണ്ടന്‍ പോലീസിന്റെ ഗവേഷണ-വികസന വിഭാഗം ഡയറക്ടറേറ്റ്‌ പ്രസിദ്ധീകരിച്ച പഠനരേഖ നമ്മുടെ പോലീസ് മേധാവികളുടേയും രാഷ്ട്രീയ സാരഥികളുടേയും കണ്ണുതുറപ്പിക്കേണ്ടതാണ്‌: ''പ്രമാദമായ പല കേസന്വേഷണങ്ങളും വലിയ തോതില്‍ മാധ്യമ താത്‌പര്യം ആകര്‍ഷിക്കുന്നവയാണ്‌. ഫലപ്രദമായി കൈകാര്യം ചെയ്യുകയാണെങ്കില്‍ മാധ്യമങ്ങള്‍ അന്വേഷണത്തിന്‌ ശ്രദ്ധേയമായ സംഭാവനകള്‍ നല്‍കും. പൊതുജനങ്ങളില്‍ നിന്ന്‌ വിവരങ്ങള്‍ നല്‍കുന്ന ഒരുകുഴല്‍ പോലെ. അന്വേഷണത്തിന്റെ പൂട്ടുകള്‍ തുറക്കുന്ന നിര്‍ണായക തെളിവുകള്‍ മാധ്യമങ്ങള്‍ നല്‍കിയ നിരവധി ഉദാഹരണങ്ങളുണ്ട്‌. വിശാലമായ അര്‍ഥത്തില്‍ കുറ്റകൃത്യങ്ങളെ സംബന്ധിച്ച പൊതുജന കാഴ്‌ചപ്പാടും പോലീസ് സേവനവും ക്രിമിനല്‍ നീതിനിര്‍വഹണ സംവിധാനവും വിശാലമായി രൂപപ്പെടുത്തുന്നതില്‍ മാധ്യമങ്ങള്‍ക്ക്‌ സുപ്രധാന പങ്കുണ്ട്‌. കുറ്റകൃത്യങ്ങള്‍ സംബന്ധിച്ച ഭീതി തന്നെ മാധ്യമങ്ങള്‍ തുടച്ചുനീക്കും.''
പ്രമാദമായ കേസന്വേഷണങ്ങളില്‍ ഉന്നത അന്വേഷണ ഉദ്യോഗസ്ഥന്റെ നേതൃത്വത്തിലുള്ള അന്വേഷണ സംഘത്തില്‍ മാധ്യമങ്ങളുടെ ലെയ്‌സണ്‍ ഉദ്യോഗസ്ഥരെ കൂടി ഉള്‍പ്പെടുത്തണമെന്നാണ്‌ ലണ്ടന്‍ പോലീസിന്റെ റിപ്പോര്‍ട്ടിലെ ശുപാര്‍ശകളിലൊന്ന്‌. സഹകരിപ്പിക്കുന്നതും ഉപയോഗപ്പെടുത്തുന്നതും പോകട്ടെ മാധ്യമപ്രവര്‍ത്തകരെ ഭീഷണിപ്പെടുത്തുകയും കുറ്റവാളികളാക്കി ചിത്രീകരിക്കുകയും പോലീസിനെ ഉപയോഗിച്ച്‌ പ്രതികള്‍ക്കൊപ്പം ജയിലിലടയ്‌ക്കുകയും ചെയ്യേണ്ടതാണ്‌ എന്ന ചിന്ത നമ്മുടെ ഭരണക്കാരെ ഇവിടെ നയിക്കുന്നു. ആ ഫാസിസ്റ്റ്‌ പ്രവണതയാണ്‌ തലനീട്ടുന്ന വലിയ അപകടം -ചെറുക്കപ്പെടേണ്ടതും.
No comments:
Post a Comment