പാര്‍ലമെന്റില്‍ 40 ശതമാനം ബില്ലുകളും പാസാക്കിയത് ഒരുമണിക്കൂര്‍ പോലും ചര്‍ച്ചചെയ്യാതെയെന്ന് റിപ്പോര്‍ട്ട്

മാധ്യമം 20.04.09.

തിരുവനന്തപുരം: 14ാം ലോക്സഭയില്‍ നിയമപരമായ പ്രശ്നങ്ങളെക്കുറിച്ച് സംസാരിക്കാന്‍ തയാറായത് 173 എം.പിമാര്‍ മാത്രം. മാത്രമല്ല, പാര്‍ലമെന്റില്‍ അവതരിപ്പിച്ച 40 ശതമാനം ബില്ലുകളും ഒരുമണിക്കൂര്‍ പോലും ചര്‍ച്ച ചെയ്യാതെയാണ് പാസാക്കിയത്. നാഷനല്‍ സോഷ്യല്‍ വാച്ച് കോളീഷന്റെ (എന്‍.എസ്.ഡബ്ല്യു.സി) ഭരണനിര്‍വഹണത്തെയും വികസനത്തെയും കുറിച്ചുള്ള സിറ്റിസണ്‍സ് റിപ്പോര്‍ട്ട് 2008-09 ആണ് പാര്‍ലമെന്റിന്റെയും എം.പിമാരുടെയും പ്രവര്‍ത്തനം വിലയിരുത്തുന്നത്. ഇന്നലെ കേസരി സ്മാരക ഹാളില്‍ നടന്ന ചടങ്ങില്‍ സംസ്ഥാന ആസൂത്രണ ബോര്‍ഡ് വൈസ് ചെയര്‍മാന്‍ ഡോ. പ്രഭാത് പട്നായക് റിപ്പോര്‍ട്ട് പ്രൊഫ. എം.എ. ഉമ്മന് നല്‍കി പ്രകാശനം ചെയ്തു.

2000 നും 2007 നും ഇടയില്‍ അനുവദിക്കപ്പെട്ടതിന്റെ 50 ശതമാനം സമയം മാത്രമാണ് പാര്‍ലമെന്റ് പ്രവര്‍ത്തിച്ചത്. 14ാം ലോക്സഭയില്‍ റെയില്‍വേ ബജറ്റും പല ബില്ലുകളും കുറഞ്ഞ സമയത്തെ ചര്‍ച്ചകള്‍ക്ക് ശേഷം പാസാക്കുകയായിരുന്നു. പ്രത്യേക സാമ്പത്തിക മേഖല ആക്ട് പോലെ പ്രധാനമായവ പോലും വിവരാവകാശ നിയമത്തെക്കുറിച്ചുള്ള നീണ്ട ചര്‍ച്ചകള്‍ക്കിടയില്‍ അവതരിപ്പിക്കുകയും രണ്ട് മണിക്കൂറുപോലും ചര്‍ച്ച ചെയ്യാതെ പാസാക്കുകയും ചെയ്യുകയായിരുന്നു. 2007-08 ല്‍ ധനകാര്യ ഇതരകാര്യങ്ങള്‍ ലോക്സഭയുടെ 35 ശതമാനത്തിലധികവും രാജ്യസഭയുടെ 45 ശതമാനത്തിലധികവും സമയം അപഹരിച്ചു. 25 നും 45 നും ഇടയ്ക്ക് പ്രായമുള്ള യുവ എം.പിമാരുടെ പങ്കാളിത്തം കുറവാണെന്നും റിപ്പോര്‍ട്ട് പറയുന്നു.

പാര്‍ലമെന്റ് നടപടികള്‍ തടസ്സപ്പെടുത്തുന്ന തരത്തിലുള്ള മുദ്രാവാക്യം വിളികള്‍, ഇറങ്ങിപ്പോക്ക്, സഭ നിര്‍ത്തിവെക്കല്‍ എന്നിവ വര്‍ധിക്കുന്നു. വിവിധ രാഷ്ട്രീയ വിവാദങ്ങളുടെ പേരില്‍ സഭാനടപടികള്‍ തടസ്സപ്പെട്ടതിനാല്‍ 11ാം ലോക്സഭ (1996-98)ക്ക് 5.28 ശതമാനം സമയം നഷ്ടപ്പെട്ടെങ്കില്‍ 12ാം ലോക്സഭയില്‍ അത് 10.66 ശതമാനമായും 13ാം ലോക്സഭയില്‍ 22.4 ശതമാനമായും ജൂണ്‍ 2004 ല്‍ അവസാനിച്ച 14ാം ലോക്സഭയില്‍ 22 ശതമാനമായും വര്‍ധിച്ചു. പാര്‍ലമെന്റിന്റെ ഒരു മിനിട്ടിന് ഖജനാവില്‍ നിന്ന് 26, 035 രൂപയാണ് ചെലവാകുന്നതെന്നിരിക്കെയാണിത്. 11, 12, 14 ലോക്സഭകളിലെ 75 ശതമാനം എം.പിമാരും 16 ഓ അതിലധികമോ ദിവസമോ മാത്രമാണ് ലോക്സഭയില്‍ എത്തിയത്. അഞ്ച് ദിവസം മാത്രം സഭാനടപടികള്‍ പങ്കെടുത്ത എം.പിമാരുടെ എണ്ണമാകട്ടെ 12ാം സഭയില്‍ വര്‍ധിച്ചു. പാര്‍ലമെന്റിലെ 'സെലിബ്രിറ്റി മുഖങ്ങളാകട്ടെ 2007 ല്‍ ചര്‍ച്ചകളില്‍ നാല് പ്രാവശ്യത്തിലധികം പങ്കെടുത്തിട്ടില്ല. പാര്‍ലമെന്റിന്റെ വിവിധ സ്റ്റാന്റിംഗ് കമ്മിറ്റികളുടെ റിപ്പോര്‍ട്ട് സര്‍ക്കാറോ മാധ്യമങ്ങളോ ഗൌരവമായി കാണുന്നില്ല. പലപ്പോഴും ചോദ്യോത്തരവേള പാര്‍ലമെന്റ് സൌകര്യപൂര്‍വം മറികടക്കാറുണ്ടത്രെ.

1997 നും 2007 നും ഇടക്ക് വിവിധ സംസ്ഥാനങ്ങളിലായി 182936 കര്‍ഷകരാണ് ആത്മഹത്യ ചെയ്തത്.

രാജ്യത്തെ നഗരവാസികളില്‍ ഒരുവിഭാഗം സമ്പന്നരാവുമ്പോള്‍ കുറഞ്ഞവേതനം ലഭിക്കുന്ന തൊഴിലാളികളുടെയും കര്‍ഷകരുടെയും സ്ഥിതി ഒരു ദശാബ്ദത്തിന് മുമ്പത്തെക്കാള്‍ ദയനീയമായതായി റിപ്പോര്‍ട്ട് പ്രകാശനം ചെയ്ത് പ്രൊഫ. പ്രഭാത് പട്നായിക് പറഞ്ഞു. സമൂഹത്തിലെ രണ്ടുവിഭാഗങ്ങള്‍ തമ്മിലുള്ള ഭിന്നതയാണ് അടിസ്ഥാനപരമായ പ്രശ്നം. പാര്‍ലമെന്റിന്റെ സ്റ്റാന്റിംഗ് കമ്മിറ്റികളുടെ റിപ്പോര്‍ട്ട് നിരാകരിക്കപ്പെടുകയാണ്. പേറ്റന്റ് നിയമം ഭേദഗതി ചെയ്യരുതെന്ന രണ്ട് പാര്‍ലമെന്ററി കമ്മിറ്റികളുടെ റിപ്പോര്‍ട്ട് മറികടന്ന് രാജ്യത്തിന് പുറത്ത് കരാര്‍ ഒപ്പിടുകയായിരുന്നുവെന്നും അദ്ദേഹം പറഞ്ഞു.
ജുഡീഷ്യറി സ്വയംഭൂ പരിപാടിയായി മാറിയിരിക്കുകയാണെന്ന് ചടങ്ങില്‍ സംസാരിച്ച ബി.ആര്‍.പി ഭാസ്കര്‍ പറഞ്ഞു. ഹിന്ദു സ്പെഷല്‍ കറസ്പോണ്ടന്റ് സി. ഗൌരീദാസന്‍ നായര്‍ സ്വാഗതം പറഞ്ഞു.






-