ലാവലിന്‍: ശിവദാസമേനോന്‍ എതിര്‍ത്തതായി റിപ്പോര്‍ട്ട്‌

Date : April 02 2009
തിരുവനന്തപുരം: പന്നിയാര്‍, പള്ളിവാസല്‍, ചെങ്കുളം ജലവൈദ്യുത പദ്ധതികളുടെ നവീകരണ ജോലികള്‍ എസ്‌.എന്‍.സി. ലാവലിന്‍ കമ്പനിക്ക്‌ കൊടുക്കുന്നതും അതിന്റെ കമ്മീഷന്‍ ഇനത്തില്‍ 98 കോടി രൂപ മലബാര്‍ കാന്‍സര്‍ സെന്ററിന്‌ ലഭിക്കുന്നതും സംബന്ധിച്ച്‌ ഒട്ടേറെ സംശയങ്ങളും എതിര്‍പ്പുകളും അന്നത്തെ ധനമന്ത്രി ടി. ശിവദാസമേനോനും ധനകാര്യവകുപ്പും ഉയര്‍ത്തിയിരുന്നതായി സി.ബി.ഐ. കണ്ടെത്തി.

ലാവലിന്‍ കേസില്‍ പത്താം പ്രതിയാണ്‌ ഊര്‍ജവകുപ്പിലെ റിട്ട. ജോയന്റ്‌ സെക്രട്ടറി എ. ഫ്രാന്‍സിസ്‌. ലാവലിന്‍ ഇടപാടില്‍ ഫ്രാന്‍സിസിനുള്ള പങ്ക്‌ പറയുന്ന ഭാഗത്താണ്‌ ശിവദാസമേനോന്റെ എതിര്‍പ്പിന്റെ കാര്യം സി.ബി.ഐ. വ്യക്തമാക്കിയിരിക്കുന്നത്‌.

ഇതുസംബന്ധിച്ച മന്ത്രിസഭാ കുറിപ്പിലും സര്‍ക്കാര്‍ ഉത്തരവിലും ധനവകുപ്പ്‌ ഉയര്‍ത്തിയ എതിര്‍പ്പുകള്‍ ഉള്‍പ്പെടുത്താതിരിക്കാനും ഫ്രാന്‍സിസ്‌ പ്രത്യേകം ശ്രദ്ധിച്ചു. കാബിനറ്റ്‌ നോട്ടിലും സര്‍ക്കാര്‍ ഉത്തരവിലും ഇത്‌ മറച്ചുവെച്ചു. ധനകാര്യവകുപ്പിന്റെ എതിര്‍പ്പ്‌ ഈ പദ്ധതിക്ക്‌ ഉണ്ടാവാതിരിക്കാന്‍ മറ്റൊരു സൂത്രവും പ്രയോഗിച്ചതായി സി.ബി.ഐ. പറയുന്നു. സാധാരണഗതിയില്‍ സെക്ഷനില്‍ നിന്ന്‌ മുഖ്യമന്ത്രിക്ക്‌ ഫയല്‍ അയയ്‌ക്കുന്നത്‌ ഒരു നിശ്ചിത നടപടിക്രമത്തിലൂടെയാണ്‌. ഊര്‍ജവകുപ്പില്‍ നിന്ന്‌ ഫയല്‍ ധനകാര്യ വകുപ്പ്‌ സെക്രട്ടറിയും ധനമന്ത്രിയും കണ്ടുവേണം മുഖ്യമന്ത്രിക്ക്‌ എത്തേണ്ടത്‌. എന്നാല്‍ ലാവലിന്‍ ഫയല്‍ ആ നടപടിക്രമം തെറ്റിച്ച്‌ വൈദ്യുതിമന്ത്രി പിണറായി വിജയന്‍ വഴി നേരിട്ട്‌ മുഖ്യമന്ത്രിക്ക്‌ പോവുകയായിരുന്നു.

ധനമന്ത്രിയുടെ തലയ്‌ക്കുമുകളില്‍ കൂടി ഫയല്‍ ഇ.കെ. നായനാര്‍ക്ക്‌ അയച്ചുവെങ്കിലും അത്‌ തിരിച്ചുവന്നപ്പോള്‍ ശിവദാസമേനോനെയും കാണിച്ചു. കരാര്‍ സംബന്ധിച്ച തീരുമാനം എടുക്കുന്നതിനുള്ള കരട്‌ കാബിനറ്റ്‌ നോട്ട്‌ തയ്യാറാക്കിയത്‌ ഊര്‍ജവകുപ്പിലെ സെക്ഷന്‍ ഓഫീസര്‍ സുധീര്‍ചന്ദ്രനായിരുന്നു. അതില്‍ മലബാര്‍ കാന്‍സര്‍ സെന്ററിന്‌ ഗ്രാന്റ്‌ ലഭ്യമാക്കുന്ന ഭാഗം വളരെ വ്യക്തമായി രേഖപ്പെടുത്തിയിരിക്കുന്നു. എന്നാല്‍ ആ ഭാഗം ജോയന്റ്‌ സെക്രട്ടറി വെട്ടി മാറ്റിയതായും സി.ബി.ഐ. കണ്ടെത്തി. അതേസമയം മലബാര്‍ കാന്‍സര്‍ സെന്ററിന്‌ പണം ഉറപ്പാക്കുന്ന കരാര്‍ ഒപ്പിടാന്‍ ലാവലിന്‍ കമ്പനി ഒരു താത്‌പര്യവും കാണിച്ചില്ല. ധാരണാപത്രത്തില്‍ മാത്രം നില്‍ക്കുകയായിരുന്നു.

98 കോടി രൂപയുടെ ഗ്രാന്റ്‌ എന്തുകൊണ്ട്‌ മലബാര്‍ കാന്‍സര്‍ സെന്ററിന്‌ കിട്ടാതെ പോയെന്ന്‌ സി.ബി.ഐ. ഉദ്യോഗസ്ഥര്‍ അന്നത്തെ അക്കൗണ്ട്‌സ്‌ മെമ്പറും കേസിലെ രണ്ടാം പ്രതിയുമായ കെ.ജി. രാജശേഖരന്‍ നായരോട്‌ ചോദിച്ചിരുന്നു, അന്ന്‌ മന്ത്രിയായിരുന്ന പിണറായി വിജയന്റെ ഓഫീസും ലാവലിന്‍ കമ്പനിയും തമ്മില്‍ ഒരു രഹസ്യ അജന്‍ഡ ഉണ്ടാക്കിയിരുന്നുവെന്നായിരുന്നു രാജശേഖരന്‍ നായരുടെ മൊഴിയില്‍ പറയുന്നത്‌. കുറ്റിയാടി അഡീഷണല്‍ എക്‌സ്‌സ്റ്റന്‍ഷന്‍ പ്രോജക്ട്‌, ശബരിഗിരി, നേരിയമംഗലം പദ്ധതികളും ധാരണാ പത്രത്തിന്റെ അടിസ്ഥാനത്തില്‍ എസ്‌.എന്‍.സി. ലാവലിന്‌ കൊടുക്കാമെന്നായിരുന്നു രഹസ്യധാരണ. പക്ഷേ, അത്‌ നടപ്പാക്കാന്‍ പറ്റാതെ പോയതുകൊണ്ടാണ്‌ അവര്‍ കാന്‍സര്‍ സെന്ററിന്‌ പണം നല്‍കാമെന്ന വാഗ്‌ദാനത്തില്‍ നിന്നും പിന്മാറിയതത്രെ.

എസ്‌.എന്‍.സി. ലാവലിന്‍ തയ്യാറാക്കി നല്‍കുന്ന എല്ലാ കരാറുകളും രേഖകളും അപ്പടി അംഗീകരിച്ച്‌ കൊടുക്കുകയാണ്‌ വൈദ്യുതിബോര്‍ഡ്‌ ചെയ്‌തുകൊണ്ടിരുന്നതെന്നും രാജശേഖരന്‍ നായര്‍ വ്യക്തമാക്കുന്നു. മന്ത്രി പിണറായി വിജയന്റെ ഭാഗത്തുനിന്നുള്ള ശക്തമായ സമ്മര്‍ദം കാരണമാണ്‌ ഇങ്ങനെ വേണ്ടിവന്നത്‌. എപ്പോഴും ലാവലിന്‍ കമ്പനിയുടെ വൈസ്‌ പ്രസിഡന്റ്‌ ക്ലോസ്സ്‌ ട്രിന്റലും പ്രതിനിധി ദിലീപ്‌ രാഹുലനും പിണറായിയെ കണ്ട്‌ സംസാരിച്ചശേഷമായിരിക്കും കെ.എസ്‌.ഇ.ബി. ഉദ്യോഗസ്ഥന്മാരെ സമീപിക്കുക. മന്ത്രിയുടെ നിര്‍ദേശങ്ങളുമായിട്ടായിരിക്കും ഇവര്‍ തങ്ങളുടെ അടുത്തുവരിക. അതുകൊണ്ട്‌ ലാവലിന്‍ ഉദ്യോഗസ്ഥര്‍ പറയുന്നത്‌ അനുസരിക്കുക മാത്രമാണ്‌ കെ.എസ്‌.ഇ.ബി. ഉദ്യോഗസ്ഥന്മാരുടെ ജോലിയെന്നും രാജശേഖരന്‍ നായരുടെ മൊഴിയിലുണ്ട്‌.

ജി. ശേഖരന്‍ നായ