കഴിഞ്ഞവര്‍ഷം കുറഞ്ഞത്‌ എണ്‍പതിനായിരത്തിലേറെ വിദ്യാര്‍ഥികള്‍

മാതൃഭൂമി 01-05-09

തിരുവനന്തപുരം: കേരളത്തിലെ രക്ഷിതാക്കള്‍ക്കും വിദ്യാര്‍ഥികള്‍ക്കും സംസ്ഥാന പാഠ്യപദ്ധതിയോടുള്ള താത്‌പര്യം വര്‍ഷംതോറും കുറഞ്ഞുവരുന്നു. 2009 വരെയുള്ള ഒരു വ്യാഴവട്ടക്കാലത്തിനുള്ളില്‍ സംസ്ഥാനത്തെ സര്‍ക്കാര്‍, എയ്‌ഡഡ്‌ മേഖലകളിലെ സ്‌കൂളുകളില്‍നിന്നും പത്തുലക്ഷത്തോളം കുട്ടികള്‍ കുറഞ്ഞതായാണ്‌ കണക്കുകള്‍ സൂചിപ്പിക്കുന്നത്‌. എണ്ണം ഓരോ വര്‍ഷവും ക്രമാനുഗതമായി കുറഞ്ഞാണ്‌ ആശങ്കാജനകമായ ഈ നിലയിലെത്തി നില്‍ക്കുന്നത്‌. 2008-09 വര്‍ഷംമാത്രം സംസ്ഥാന സിലബസ്‌ പഠിക്കുന്ന കുട്ടികളില്‍ വന്ന കുറവ്‌ 80,000 ആണ്‌.
സംസ്ഥാന പാഠ്യപദ്ധതി വിടുന്ന കുട്ടികളുടെ എണ്ണം ഏറ്റവും പ്രകടമാകുന്നത്‌ തിരുവനന്തപുരം, എറണാകുളം, തൃശ്ശൂര്‍ ജില്ലകളിലെ നഗരപരിധിയില്‍പ്പെട്ട സ്‌കൂളുകളിലാണ്‌. തിരുവനന്തപുരത്ത്‌ കഴിഞ്ഞവര്‍ഷം 11,168 പേരും എറണാകുളത്ത്‌ 12,844 പേരും തൃശ്ശൂരില്‍ 10,858 പേരും കുറഞ്ഞു. എന്നാല്‍, വയനാട്‌ ജില്ലയില്‍ 412 വിദ്യാര്‍ഥികള്‍ സര്‍ക്കാര്‍ സ്‌കൂളുകളില്‍ വര്‍ധിച്ചതായാണ്‌ കണക്ക്‌. ആലപ്പുഴ ജില്ലയിലും സര്‍ക്കാര്‍ പാഠ്യപദ്ധതിക്ക്‌ അനുകൂലമായ നേരിയ മാറ്റം കണ്ടുതുടങ്ങുന്നുണ്ട്‌.
സംസ്ഥാന പാഠ്യപദ്ധതി പിന്തുടരുന്ന സ്‌കൂളുകളില്‍ ഒന്നാംക്ലാസില്‍ ചേരുന്ന വിദ്യാര്‍ഥികളുടെ എണ്ണത്തിലും പ്രകടമായ കുറവുണ്ട്‌. 1998-99ല്‍ 4,64,925 കുട്ടികള്‍ ഒന്നില്‍ ചേര്‍ന്നപ്പോള്‍ 2008-09ല്‍ ഇത്‌ 3,73,807 ആയി കുറഞ്ഞു. എന്നാല്‍ സി.ബി.എസ്‌.ഇ., ഐ.സി.എസ്‌.ഇ. തുടങ്ങിയ കേന്ദ്രസിലബസുകള്‍ പഠിപ്പിക്കുന്ന സ്‌കൂളുകളിലെ പ്രവേശനനിരക്ക്‌ ഉയരുന്നുണ്ട്‌. 1998-99ല്‍ 160 സി.ബി.എസ്‌.ഇ. സ്‌കൂളുകള്‍ ഉണ്ടായിരുന്ന സ്ഥാനത്ത്‌ ഇന്നത്‌ അറുനൂറ്‌ കവിയും.
അതേസമയം, കേന്ദ്ര സിലബസ്സിലേക്ക്‌ കുട്ടികള്‍ മാറുന്നതുകൊണ്ടുമാത്രമല്ല സംസ്ഥാന പാഠ്യപദ്ധതിയില്‍ കുട്ടികള്‍ കുറയുന്നത്‌ എന്നതും കണക്കിലെടുക്കണം. കുട്ടികളുടെ എണ്ണത്തിലും ജനനനിരക്കിലും വര്‍ഷംതോറും വരുന്ന കുറവും ഒരു ഘടകമാണ്‌.

സൗകര്യം വര്‍ധിച്ചു

സര്‍ക്കാര്‍, എയ്‌ഡഡ്‌ സ്‌കൂളുകളിലെ സൗകര്യങ്ങള്‍ മുന്‍കാലങ്ങളെ അപേക്ഷിച്ച്‌ ഏറെ ഭേദപ്പെട്ടിട്ടുണ്ട്‌. അതിനാല്‍ സൗകര്യമില്ലായ്‌മ മാത്രമല്ല കുട്ടികളെ കേന്ദ്രസിലബസ്സിലേക്ക്‌ ആകര്‍ഷിക്കാന്‍ കാരണം. ഇംഗ്ലീഷില്‍ മക്കള്‍ പ്രാവീണ്യം നേടണമെന്ന മാതാപിതാക്കളുടെ ആഗ്രഹവും ഒരു കാരണമാണ്‌. പുതിയ പഠനരീതിയുടെ വരവോടെ സംസ്ഥാന പാഠ്യപദ്ധതിയുടെ നിലവാരം താഴ്‌ന്നതും രക്ഷിതാക്കളെ മാറിച്ചിന്തിക്കാന്‍ പ്രേരിപ്പിച്ചു. ആഘോഷമായ പ്രവേശനോത്സവവും എല്ലാ പഠനവും കളിയിലൂടെയാക്കിയതും എന്തെഴുതിയാലും വാരിക്കോരി മാര്‍ക്കിടുന്നതും മാത്രമല്ല ശരിയായ പഠനമെന്ന്‌ നല്ലൊരു വിഭാഗം രക്ഷിതാക്കളും ചിന്തിക്കുകയുണ്ടായി. സംസ്ഥാന പാഠ്യപദ്ധതിയില്‍ പത്തും പന്ത്രണ്ടും ക്ലാസ്‌ കഴിയുന്നവര്‍ക്ക്‌ കേന്ദ്ര സിലബസ്സില്‍ പഠിച്ചവരുമായി പിടിച്ചുനില്‍ക്കാന്‍ ആവുന്നില്ല എന്നതും പ്രശ്‌നമാണ്‌.
സംസ്ഥാനപാഠ്യപദ്ധതി പിന്തുടരുന്ന സര്‍ക്കാര്‍ സ്‌കൂളുകളിലെ അധ്യാപകരുടെ അമിതരാഷ്ട്രീയവത്‌കരണം, അടിസ്ഥാനസൗകര്യക്കുറവ്‌, പാഠ്യപദ്ധതിയില്‍ നിലനില്‍ക്കുന്ന ആശയക്കുഴപ്പം എന്നിവ രക്ഷിതാക്കളെ അകറ്റുന്നുണ്ട്‌.

മാനദണ്ഡം മാറിയത്‌ പ്രീതി വര്‍ധിപ്പിച്ചു

പ്രൊഫഷണല്‍ കോളേജ്‌ മാനദണ്ഡങ്ങളിലും പ്രവേശനപരീക്ഷാരീതികളിലും അടുത്തിടെ വന്ന മാറ്റം സംസ്ഥാന പാഠ്യപദ്ധതിയില്‍ പഠിക്കുന്നവര്‍ക്ക്‌ ഗുണകരമായി ചൂണ്ടിക്കാണിക്കപ്പെടുന്നു. ഹയര്‍സെക്കന്‍ഡറിയുടെ മാര്‍ക്കുകൂടി പ്രവേശനത്തിന്‌ കണക്കാക്കാനാണ്‌ പുതിയ തീരുമാനം. സംസ്ഥാന സിലബസ്സില്‍ വിജയശതമാനവും മാര്‍ക്ക്‌ ശരാശരിയും ഉയര്‍ന്നുനി'ുന്നതിനാല്‍ അവര്‍ക്കത്‌ സഹായകമാവും. ഓരോ സിലബസ്സിലെയും കുട്ടികള്‍ക്ക്‌ ലഭിക്കുന്ന മാര്‍ക്കിന്‌ 'സ്റ്റാന്‍ഡേര്‍ഡ്‌ ഇന്‍ഡക്‌സ്‌' തയ്യാറാക്കിയാണ്‌ എന്‍ട്രന്‍സ്‌ പരീക്ഷയുടെ മാര്‍ക്കിനൊപ്പം പരിഗണിക്കുക. സി.ബി.എസ്‌.ഇ., അണ്‍ എയ്‌ഡഡ്‌ സ്‌കൂളുകളില്‍ പലതിന്റെയും അംഗീകാരം സംബന്ധിച്ച്‌ നിലനി'ുന്ന അനിശ്ചിതത്വവും സര്‍ക്കാര്‍ സിലബസ്സിലേക്ക്‌ ചെറിയതോതിലെങ്കിലും കുട്ടികളെ ആകര്‍ഷിക്കുന്നുണ്ട്‌. കുറഞ്ഞ പഠനച്ചെലവാണ്‌ മറ്റൊരു ഘടകം.
(തുടരും)