മദ്യപാന ശൌണ്ഡനോ മലയാളി?

മധ്യരേഖ,ഡി. ബാബുപോള്‍

ഏറ്റവും വലിയ തിരുവോണവിശേഷമായി മാധ്യമങ്ങള്‍ അവതരിപ്പിച്ചത് മലയാളിയുടെ മദ്യപാനം ആയിരുന്നല്ലോ ഇത്തവണ. കേരളം പാനമണ്ഡലം, ഇത് പാനശീലരും അതിലേറെ പാനശൌണ്ഡരും അധിവസിക്കുന്ന പാനഭൂമിക എന്ന മട്ട്. അത് വേണ്ടിയിരുന്നില്ല. ഇത്തരം വാര്‍ത്താപ്രസാരണങ്ങള്‍ നല്‍കുന്ന സന്ദേശം മലയാളികളായ മാനുഷരെല്ലാരുമൊന്നുപോലെ മഹാമദ്യപാനികളാകുന്നു എന്നതിനാല്‍ നമുക്കും കുടിക്കാം മദ്യം എന്നതാണ്. കെ.ഇ. മാമ്മനെ പോലെ ഒരു ഗാന്ധിയനെ ദുഃഖിപ്പിക്കാനും പ്രകോപിപ്പിക്കാനും ഈ പ്രയോഗം സഹായിച്ചേക്കാം. എന്നാല്‍ നവതിയുടെ അയലത്തെ അദ്ദേഹത്തെക്കാള്‍ എത്രയോ അധികമായി വിംശതിയുടെ അയല്‍ക്കൂട്ടത്തിലുള്ള ചെറുപ്പക്കാര്‍ മദ്യാനുകൂലികളായി മാറാനാണ് ഇതൊക്കെ വഴിയൊരുക്കുന്നത് എന്ന് ആലോചിക്കേണ്ടിയിരിക്കുന്നു.

ഈ വാര്‍ത്തയില്‍തന്നെ രണ്ട് കാര്യങ്ങള്‍ വിസ്മരിക്കപ്പെട്ടിരിക്കുന്നു എന്ന സംഗതി സൂക്ഷ്മദൃക്കുകളല്ലാതെ ശ്രദ്ധിച്ചിരിക്കയില്ല. ഒന്നാമത് വില. എത്ര ലിറ്റര്‍ വിറ്റു എന്നതല്ല വാര്‍ത്ത. എത്ര കോടി രൂപക്ക് വിറ്റു എന്നതാണ്. സകലമാന സംഗതികള്‍ക്കും വില കൂടുമ്പോള്‍ മദ്യത്തിനും കൂടാതിരിക്കുമോ? കഴിഞ്ഞവര്‍ഷം അഞ്ഞൂറ് രൂപയായിരുന്നു ഒരു പ്രത്യേകമദ്യത്തിന്റെ വില എന്ന് വിചാരിക്കുക. ആയിരം കുപ്പി ചെലവായി. മൊത്തം വിറ്റുവരവ് അഞ്ച് ലക്ഷം രൂപ. ഈ വര്‍ഷം വില കൂടി എന്ന് കരുതുക. അഞ്ഞൂറ് അഞ്ഞൂറ്റമ്പതായി. വിറ്റുവരവ് അഞ്ചര ലക്ഷം രൂപ. വര്‍ധനയുടെ ശതമാനം പത്ത്. കുടിക്കപ്പെട്ട മദ്യത്തിന്റെ അളവില്‍ വര്‍ധന ഇല്ല. ഇനി ഈ വര്‍ധന തന്നെ നിര്‍മാതാവിന്റെ വക ആവണമെന്നില്ല എന്നുകൂടി ഓര്‍ക്കുക. ഗുരുദാസന്‍ മന്ത്രിയോ ഐസക് മന്ത്രിയോ നികുതിനിരക്ക് കൂട്ടിയാലും പോരേ? അല്ലെങ്കില്‍ തന്നെ ഈ തുകയില്‍ കൂടുതലും നികുതിയല്ലേ? ഈയിടെ ഒരു പ്രശസ്ത ബഹുരാഷ്ട്ര കമ്പനിയിലെ ഉയര്‍ന്ന ഉദ്യോഗസ്ഥന്‍ പറഞ്ഞത് കേള്‍ക്കുക. അവര്‍ നൂറ്റിയിരുപത് രൂപക്ക് ബീവറേജസ് കോര്‍പറേഷന് നല്‍കുന്ന മദ്യം വിപണിയിലെത്തുമ്പോള്‍ കേരളത്തില്‍ വില എണ്ണൂറ്. ദല്‍ഹിയില്‍ അഞ്ഞൂറ്, പട്ടാള കാന്റീനില്‍ ഇരുനൂറ്റമ്പത് ഇങ്ങനെയൊക്കെയാണത്രെ.

അതായത് വിറ്റുവരവ് കൂടിയതുകൊണ്ട് ഉപഭോഗം കൂടി എന്ന് തെളിയുന്നില്ല. കുടിയന്മാരില്‍നിന്ന് ഈടാക്കുന്ന നികുതിയാണ് ഈ തുകയില്‍ മുക്കാല്‍പങ്കും എന്നത് തെളിഞ്ഞിട്ടുണ്ടെങ്കിലും തിരിച്ചറിയപ്പെടുന്നുമില്ല. രണ്ടാമത്തെ കാര്യം പണപ്പെരുപ്പം തന്നെ. പന്ത്രണ്ട് ശതമാനം സര്‍ക്കാര്‍ തന്നെ സമ്മതിച്ചിട്ടുണ്ട്. അതനുസരിച്ച് വില കൂടുമല്ലോ. കഴിഞ്ഞവര്‍ഷം ആഭരണങ്ങള്‍ക്കും തുണിത്തരങ്ങള്‍ക്കും വേണ്ടി മലയാളി ചെലവാക്കിയ തുകയും ഇക്കൊല്ലം ചെലവാക്കിയ തുകയും താരതമ്യപ്പെടുത്തിയാല്‍ മദ്യപാനം മാത്രമാണോ കൂടിയത് അതോ പൊതുവായ ഉപഭോഗമാണോ എന്നറിയാമല്ലോ. ആ കണക്ക് ആരും കൂട്ടിയ മട്ടില്ല. എന്നല്ല അവിടെയൊക്കെ വിറ്റുവരവ് കൂടുമ്പോള്‍ ഓണച്ചെലവ് ദുര്‍വഹമായി എന്നാണ് വാര്‍ത്ത. ആ ചെലവ് വേണ്ടതാണോ എന്നൊരു സോഷ്യല്‍ ഓഡിറ്റിംഗ് മാധ്യമങ്ങള്‍ നടത്തേണ്ടതല്ലേ? എന്റെ കുടുംബത്തിനും ജോലിക്കാര്‍ക്കുമായി ഞാന്‍ പന്തീരായിരം രൂപ ചെലവാക്കി. എന്നാല്‍, എനിക്ക് കിട്ടിയതോ, ഏകദേശം എണ്ണായിരം രൂപക്കുള്ള വസ്ത്രങ്ങള്‍.

പെന്‍ഷനായ എനിക്ക് എന്തിനാണ് ഇത്ര ഓണക്കോടി? ഓണമല്ലേ വല്ലതും വാങ്ങണ്ടേ എന്നതാണ് ലൈന്‍. ഇതിനെതിരെ ഒരു ബോധവത്കരണവും ഒരു മാധ്യമവും നടത്തുന്നില്ല. പത്രത്തിന്റെ മുക്കാലും പരസ്യം നിറഞ്ഞിരിക്കുമ്പോള്‍ പരസ്യപ്പെടുത്തുന്നതൊന്നും വാങ്ങരുത് എന്ന് പറയാതിരിക്കുന്നതിലെ ധാര്‍മികത ഞാന്‍ തിരിച്ചറിയാതിരിക്കുന്നില്ല! എന്റെ വാദം അതല്ല. മദ്യത്തിന്റെ ഉപഭോഗം വര്‍ധിച്ചു എന്നത് വാര്‍ത്തയാക്കുമ്പോള്‍ മദ്യപാനം നാട്ടുനടപ്പാണ് എന്നു കൂടെ വിളംബരം ചെയ്യുകയാണ് എന്ന സത്യം മാധ്യമങ്ങള്‍ തിരിച്ചറിയണം എന്നതാണ് എന്റെ പ്രമേയം.

മദ്യനിരോധം ഗുണം ചെയ്യും. എന്നാല്‍, അത് പ്രായോഗികമല്ല. അരനൂറ്റാണ്ടിനപ്പുറം തിരുവനന്തപുരവും മലബാറും മദ്യരഹിതമേഖല ആയിരുന്നു. അന്ന് തിരുവനന്തപുരത്തെ അഞ്ഞൂറ് എഞ്ചിനീയറിംഗ് വിദ്യാര്‍ഥികളില്‍ അഞ്ച് പേരോ മറ്റോ മദ്യപിച്ചിരുന്നിരിക്കാം. ഇപ്പോള്‍ അതല്ല അവസ്ഥ. മദ്യപിക്കുന്ന കുട്ടികളാണത്രെ ഭൂരിപക്ഷം. എങ്കിലും നിരോധം അപ്രായോഗികമാണ്. അമേരിക്ക ഉള്‍പ്പെടെ എത്രയോ രാജ്യങ്ങള്‍ നമ്മെ അത് പഠിപ്പിച്ചതാണ്.

അതേസമയം ബോധവത്കരണത്തിലൂടെ വര്‍ജനം പ്രോല്‍സാഹിപ്പിക്കാം. നമ്മുടെ നാട്ടില്‍ മദ്യത്തിന് പരസ്യം പാടില്ല. പലരും സറോഗേറ്റ് പരസ്യങ്ങള്‍ നല്‍കാറുണ്ട്. അത് പക്ഷേ, പുതിയ കുടിയന്മാരെ സൃഷ്ടിക്കുന്നില്ലല്ലോ. അറ്റകൈ സറോഗേറ്റ് പരിപാടി മല്ലയ്യയുടേതാണ്; കിംഗ് ഫിഷര്‍ ആണ് മൂപ്പരുടെ കച്ചവടം. അത് മദ്യം. അതിന് പരസ്യം വയ്യ. മല്ലന്‍ വിമാനക്കമ്പനി തുടങ്ങി. പേര്? കിംഗ് ഫിഷര്‍.. ലോഗോ? ബിയറിന്റേതു തന്നെ. അതും പുതിയ കുടിയന്മാരെ സൃഷ്ടിക്കുന്നില്ല. ബിയറെങ്കില്‍ കിംഗ്ഫിഷര്‍, അത്ര തന്നെ. എന്നാല്‍ വിപുലമായ ഒരു പ്രചാരണയജ്ഞം ഉണ്ടാവേണ്ടതുണ്ട് മദ്യത്തിനെതിരായി.

ഗാന്ധിയന്മാരുടെ പ്രസ്താവനയും പ്രതിഷേധവും പോരാ. അതൊക്കെ ഏശുന്ന കാലം പോയി. സര്‍വാദരണീയനായ ബേബച്ചായനെ^ കെ.ഇ. മാമ്മന്‍^ വട്ടുകേസായി തള്ളുന്ന തലമുറയുടെ കൈയിലാണ് താക്കോല്‍. അതുകൊണ്ട് വ്യാപകമായ പ്രചാരണം വേണം. മദ്യക്കുപ്പിയില്‍ എന്തോ എഴുതിവിടുന്നുണ്ട് ഇപ്പോള്‍. അത് പോരാ. പള്ളിയില്‍ വിശുദ്ധ കുര്‍ബാനയുടെ പ്രസാദം സ്വീകരിക്കുന്നിടത്തു പോലും പറ്റിയാല്‍ ക്യൂ തെറ്റിക്കുന്ന മലയാളി അച്ചടക്കത്തോടെ പരാതിയില്ലാതെ ക്യൂവില്‍ നില്‍ക്കുന്ന ഒരേയൊരു സ്ഥലം ബീവറേജസിന്റെ കൌണ്ടറാണല്ലോ! അതുകൊണ്ട് അല്ലറചില്ലറ മാമ്മനിസം കൊണ്ടൊന്നും തീരുന്നതല്ല പ്രശ്നം എന്ന് സമൂഹവും സര്‍ക്കാറും തിരിച്ചറിയണം. ഈ ബീവറേജസ് കൌണ്ടറിനോട് ചേര്‍ന്ന് മദ്യവിരുദ്ധ പരസ്യങ്ങള്‍ സ്ക്രീനില്‍ കാണിക്കുക. കണ്ടുകണ്ട് നീങ്ങട്ടെ ക്യൂ. നാം എങ്ങനെയാണ് ജനനനിരക്ക് കുറച്ചത്? ബസിന്റെ പിന്നിലും കുടുംബാസൂത്രണം. അതുപോലെ വ്യാപകമായ ഒരു പരിപാടി തുടങ്ങാമോ? കമ്പനികള്‍ക്ക് പ്രോല്‍സാഹിപ്പിക്കാം.

ഇന്ത്യയില്‍ തൊണ്ണൂറ്റഞ്ച് ശതമാനം സ്ത്രീകളും സാനിറ്ററി നാപ്കിന്‍ എന്ന് കേള്‍ക്കാതിരുന്ന തൊണ്ണൂറുകളില്‍ എന്തായിരുന്നു പരസ്യം? നാപ്കിന്‍ ഉപയോഗിക്കുന്നതാണ് പരിഷ്കാരം എന്ന് ബോധ്യപ്പെടുത്തുന്ന പരസ്യങ്ങള്‍ അരങ്ങുവാണു. നാലഞ്ച് കൊല്ലം കഴിഞ്ഞപ്പോള്‍ അതിന് പകരം ബ്രാന്‍ഡായി. ഇപ്പോള്‍ സൂപ്പര്‍ ബ്രാന്‍ഡ്. കഴിഞ്ഞ പതിനഞ്ച് കൊല്ലത്തിനിടെ ഭാവശുദ്ധിയുള്ള സ്ത്രീകളില്‍ അഞ്ച് ശതമാനം കൂടി നാടന്‍ തുണി വിട്ട് നാപ്കിന്‍ സംസ്കാരത്തിലെത്തിയത്രെ. 1990ലെ അഞ്ച് ശതമാനം നാപ്കിന്‍ ധാരികള്‍ 2007ല്‍ പത്തായി. അതാണ് പരസ്യത്തിന്റെ പണി. അതുകൊണ്ട് മദ്യവിരുദ്ധ പ്രചാരണത്തിന് ഇറങ്ങിത്തിരിക്കുന്ന കമ്പനികള്‍ക്ക് കേന്ദ്രം വമ്പന്‍ നികുതിയിളവുകള്‍ പ്രഖ്യാപിക്കട്ടെ. എമ്മാറെഫും റിലയന്‍സും ഒക്കെ ഇറങ്ങിത്തിരിക്കും പരസ്യവുമായി. 1903ല്‍ പ്രസിദ്ധീകൃതമായ ഒരു കവിതയിലെ വരി ന്യൂസിലാന്റ് പ്രചാരണത്തിനുപയോഗിച്ചു. കുടിയേറ്റക്കാരെ ചാക്കിടാന്‍; ദൈവത്തിന്റെ സ്വന്തം നാട്. പിന്നെ അത് മറന്നു കിടന്നു. ഒടുവില്‍ പത്തിരുപത് കൊല്ലം മുമ്പ് പ്രതിഭാധനനായ ഒരു ചെറുപ്പക്കാരന്‍^മെന്‍ഡസ്^ അത് പൊടി തട്ടി എടുത്തു.

അങ്ങനെ കേരളം 'ദൈവത്തിന്റെ സ്വന്തം നാട്' എന്ന് വിഖ്യാതമായി. ഓയെന്‍വിയുടെ ഒരു വരിയുണ്ട്^ഒരു സങ്കീര്‍ത്തനം പോലെ. എന്നാല്‍ ഇപ്പോള്‍ അതു കേട്ടാല്‍ നാം പെരുമ്പടവത്തെയല്ലേ ഓര്‍ക്കുക? ന്യൂസിലാന്റിന്റെ പരസ്യം വിസ്മൃതിയിലായതും നമ്മുടേത് നിത്യഹരിതമായി തുടരുന്നതും എല്ലാം ഒരു നൈരന്തര്യത്തിന്റെ പ്രശ്നമാണെന്നര്‍ഥം. എമ്മാറെഫും റിലയന്‍സും ഇറങ്ങിത്തിരിച്ചാല്‍ മദ്യവിരോധം വളര്‍ത്താന്‍ അഞ്ച് കൊല്ലം പോരേ? മദ്യം വര്‍ജിക്കാനുള്ള പ്രചാരണം മൂലം മദ്യപാനം വര്‍ധിക്കുന്നു. അത് മാന്യതയുടെ മാനദണ്ഡമാവുന്നു, ഐ.ടി പ്രൊഫഷനലുകള്‍ കുടിക്കുന്നു എന്നൊക്കെ തലങ്ങും വിലങ്ങും എഴുതി മദ്യപാനം പ്രചരിപ്പിക്കാതിരിക്കലാണ് അതിനുള്ള ആദ്യപടി.